Neẓra yakk d akken addal yesɛa azal d ameqqṛan deg tudert n yal ass, s yakk iḥricen iɣef yettwabḍa: Ddabex n uḍar, ddabex n ufus, tazzla, karati, atg.
D ayen i yeǧǧan inaddalen n taddart n Ayt Tɛisiwt, deg tɣiwant n Ayt Smaɛel, s yimectaḥ s yimeqqṛanen, ad ssutren deg uselway n tɣiwant-nsen i wakken ad d-yelhu deg unnar-a akked leqdic n ureqqeɛ-ines. Segmi i d-ɣlin ddeqs n yidɣaɣen i yeswaɣen yiwet n tama seg unnar, uɣalen yilemẓiyen-a, ttkukrun ɣef yixfawen-nsen ad uraren dinna, acku nnig tqaɛet-agi d adrar.
Yerna, ɣef wawal-nsen, ur yesɛi ara unnar-a, ula d zzerb n tɣellist ara asen-d-yawin kra n lehna i yiqerra. Ula mi ara yeɣli ddabex berra i unnar, sɛeddayen iḥeyyaren imi d tiẓgi i yellan ddaw-s. Dɣa, seg yiwet n tama, ttaggaden amihi ɣef tdawsa-nsen, acku amkan-nni, llan deg-s aṭas n yiɣerṣiwen yettḍurrun, seg tama-nniḍen ttenɛettaben aṭas akken ad d-jemɛen ddabex-nsen deg tfurmiwin n yiblaḍen.
Tikwal ihi, ur ssawaḍen ara, ad d-afen ddabex i asen-iɣellin. « Nessutur deg yimdebbren n tɣiwant-nneɣ s umata, ad d-lhun s wayen iwumi yesra unnar-agi, ama d afrag neɣ d ijga neɣ d agens i yellan deg yir liḥala », i d-yenna yiwen n yilemẓi anaddal. Ad d-nesmekti d akken annar-agi n tamiwin, ugar n ṭẓa n yiseggasen segmi yettwabna war ma yella-d seg yimir-nni uselhu-ines s wudem iwulmen.
S taẓayt n yiseggasen, ula d kra n ttawilat i yesɛa qburen. Ɣer taggara, ad d-nini belli seg wakken yexser waddad n unnar-a n Txerrubin n ɛeyyad armi d-yeggra d aɛewwiq, llan wid i yeǧǧan maḍi addal. Ma yella d wid yeṭṭfen deg-s, azgen deg-sen yettruḥ ɣer dinna, azgen yesmenyif ad yesruḥ adrim, ad isub neɣ ad yali ɣer yinnaren yelhan, wala ma yurar din. Ulamma ur d-yettili dima umsifham gar warrac n tuddar yemgaraden, imi ideyyeq wakud d littaɛ.
K. K.