Ama d imezdaɣ n tɣiwant-nni neɣ d iseqdacen n ubrid s umata, aṭas i yegren tamawt taggara-a i uḥbas i d-yellan deg yiqeddicen n lebni n yiwet n tqenṭert di tɣiwant n Melbu, 35 n yikilumitren ɣer Usamar n waɣir n Bgayet, i yetturaǧun ad tili d tamaqqant gar ubrid aɣelnaw wis 9 d wis 43, d tɣiwanin n Melbu, Suq Letnin d Temriǧt. Ɣef wawal n umazan n Bgayet Mass Nasir Ɛebdun, i d-yesmektan taluft-a ussan kan, yebda usenfar-a n tqenṭert deg useggas n 2015 akken zun ad iheggi i useggas n 2016. Maca ar ass-a, qrib kraḍ n yiseggasen seld, mazal ur yekfi uqeddic-a ideg saramen aṭas yinehharen.
Ayen yesḥissifen ugar ɣer yiɣermanen i yeḥsan s wazal n ubrid-a amaynut, d mi tɣab akka tura deg umkan termist i d-yelhan d lecɣal n usbedd n tqenṭert, armi llan wid iɣilen d akken yettwaǧǧ usenfar-a, neɣ ur d-yettili ara usemmed-ines alamma d wis melmi. Yewwi waya amazan Nasir Ɛebdun ad iger tiɣri i yinesdabuyen idiganen i terza temsalt, ad gen kra s zzirban akken ad iserreḥ usenfar-a, ad kemmlen yiqeddicen-is. Ɣef wawal-is dima, lfayda n ubrid-a n tqenṭert d taɣelnawt, imi mačči ala at Bgayet ara yenfeɛ, wanag ula d iseqdacen n ubrid i d-yettasen si Jijel d Seṭṭif. «Akka i inuḥ ustehzi-a di lecɣal ɣur-neɣ.
Ad d-ilal usenfar s wazal akken ad yessefsusi taɛkemt ɣef medden, maca ad iɛeṭṭel ugar n wayen i d-yewwi lḥal », i aɣ-d-yenna yiwen n unehhar si Bgayet. Syin yerna-d: « Lemmer i terbiḥeḍ ay ul, tili thegga akka tura tqenṭert-a, i wakken xersum deg unebdu i d-iteddun, ad tenqes lmeḥna n tikli deg yiberdan n Bgayet ».
M. K