Di rreḥba tis 8 n yidles d ugtelɣu amaziɣ i d-yellan deg yimalas yezrin di Tubiret, nemmuger-d yiwen seg yimḍebbren n Usqamu Unnig n Timmuzɣa. Wagi d Hamid Bilek i nesteqsa ɣef leqdic i d-yellan di rreḥba-a d tegnatin ideg i tɛedda.
Aɣmis n yimaziɣen : D rreḥba tis 8 daɣ tis 6 di Tubiret. Ayadra d acu i d-yellan d amaynut aseggas-a ?
Hamid Bilek : ayen i d-yellan d ayen i tettwalim yid-neɣ. Ttawilat iwulmen llan d ayen dɣa i yessawḍen s aseqɛed n waṭas n lecɣal. Iṛeggem-aɣ akka lwali n Tubiret dakken idlisen ur nenzi ara ad ten-yaɣ iwakken ad ten-yessiweḍ ɣer temkerḍiyin n tɣiwanin imerra, d acu kan, yettban azgen kan n tektabin i tuɣ tmehla n yidles. S tidet, texreb acemma nniyya n kra n yixxamen n tezrigin i yenwan ad uɣalent s yifassen d ilmawen.
Amaynut yella-d aseggas-a. D l’OPU, ayen i d-ssufuɣent tesdawiyin yella-d tikkelt-a, ama d inadiyen n taggara n uswir yerzan turagt, neɣ majister akked ddukturat. Am wakken daɣ i d-yella uṛeggem n usufeɣ n mraw n yinadiyen yemxallafen yal aseggas di tlata i yigezduyen. Yella-d daɣ umaynut s tisin n wid yettḥaraben ɣef yizerfan n unaẓur.
. Acu n tegnatin ideg tɛedda rreḥba-agi ?
. ad d-iniɣ dakken tɛedda rreḥba di tegnatin igerzen. Ddeqs n yimdanen i d-yerzan, wenɛen yisaragen i d-yettwaheggan. Nessaram kan deg yiseggasen i d-iteddun ad yegget ugdud ara iḥeḍren i wayen akk ara d-nessewjed.
. Amek i tettwaliḍ ad yennerni ccan n tmaziɣt di Tubiret ?
. Nezmer ad d-nini belli nessen tilawt n tmetti nd tesneslit n temnaḍt-a. D ayen i yeǧǧan ass-a Asqamu Unnig n Timmuzɣa yettuɣal-d yal aseggas s rreḥba n udlis d ugtelɣu amaziɣ. Ilaq-as i Tubiret yiwen n usihar yecban wa ara yesnernin di ccan n tmaziɣt, iwakken rreḥba-a ad tili di lmendad i wid yella akka deg unnar ama d iselmaden, inelmaden d yisdawayen. Am wakken i nebɣa ad nessiweḍ leqdic-nneɣ ɣer temnaḍin irkelli n Tubiret imi ur nebɣi beṭṭu wala miḥyaf, neḥsa belli s snesla-a n tektabt ara d-lalen aṭas n yisenfaren.
Yesteqsa-t : S. M