Wi d-yennan ad d-yass wass, imezdaɣ n tmurt n Libya ad d-fɣen seg wanu ideg ten-yerra Lqeddafi ? Ur yeshil ara ubeddel n teswiɛt yekkan azal n rebɛin n yiseggasen, maca tabɣest n yimezdaɣ n Benɣazi ssawḍen ad beddlen lewhi i lemwaǧi. Maca, tabɣest i yiman-is ur tezmir ad tqabel talafsa ikesben tadrimt, leslaḥ d lɛesker. Ihi, gren tiɣri i leǧnas iwakken ad asen-d-ilin di lmendad mgal adiktaturi. D tiɣri-nni n tmucuha : Ḥarem ram, zarem ram, ay arraw n teɣribt anida tellam ! Fransa, Marikan, Legliz d Lqaṭer jban-d am yira, sersen-d ṭṭlam deg uzal ɣef Lqeddafi. Mi akken yemmut, aselway iɛeddan n Fransa, Sarkozy yereza ɣer Libya, ibeggen-d addud n tmurt-is ɣer yidisan n ugdud yettwaḥeqren acḥal d aseggas. Dɣa, Ilibiyen lhan-d d useqɛed n tmurt-nsen s tefranin, d usebded n tseqquma. Ɣer wiyaḍ, teddez tebrez, ad nɛeddi s ayen-nniḍen ! Meɛna, akken i as-yenna Lwennas : ur ten-ttamnet ! D iɛdawen n tudert, ma yella ṭṭfen-tt neḥraret, ad tenger, tekfa ! Akka ihi, Marikan i d-yegren afus-is iḍelli, ḥuccen-as iḍarren-is ass-agi. Imqeddem-is di Libya d tlata n yimɛawnen yellan yid-s ttwanɣen deg yiwet n txazabit i asen-xedmen Yisalafiyen. D wa i d lxir i uberkan n uqerru. Yak yella di lemtel : mi lluẓen ad k-ttren, mi rwan ad k-ččen ! Qqaren-d akka d asaru-nni yeccemten Nnbi i d ssebba n tedyant-a, maca d ayen ur nezmir ad yekcem lbal n kra akk yessexdamen allaɣ-is, labeɛda wid qqsen yizerman yecban ad yičumar i d-isersen yir aṭṭan di tmurt-nneɣ. Yiwen n ubrid i ṭṭafaren, win n tikreḍt yebnan ɣef tmenɣiwt, d usenger n terwiḥin. Ula d ass ideg d-teḍra tedyant-a yettwafren, imi d 11 seg ctember, d amulli wis 11 n tedyant n « les tours jumelles ». Ass-a, ma yella Obama yerfa ɣef wayen yeḍran, Hollande yefqeɛ, Massa Clinton tessutur s uɛaqeb n widen yellan deffir txazabit-a, tamettant n yimqeddem amarikani ur tezmir d tin ara yesfeḍ smaḥ tessutur s wudem unṣib tmurt n Libya. Widak, ẓran d acu i teswa terwiḥt, mačči seg wid izellun imdanen am yizamaren. Akka i d azrem n uqelmun ; akka i tḍerru d win i d-irebban azrem ɣer yiri-s, di tesmeḍ ad yexmet, mi yeḥma ad yeqqes. D tamsirt i tmura tiberraniyin yettakken afud i yicenga.
S. M.