Ur rğin ara Imaziγen n Libya deg leḥkum nsen i wakken ad yexdem kra i tmaziγt imi tεedda yakan fell-asen. Qqaren yimezwura : ‘’win yeqqes uzrem yettagad aseγwen’’. Ihi fran-tt d rraw nsen : ayen fγan, ad t-rren yella. Dγa, akka i mmsefhamen akk Yimaziγen n Libya i wakken ad rren ass n yennayer d tameγra taγelnawt mebla ma rğan rray n udabu nsen. Wwḍen Yimaziγen n Libiya γer wanect-a imi imḍebber n tmurt ur ṭṭifen ara deg wawal nsen : kra akk i asen-ṛeggmen ur d-yeḍri ara. Dγa deg useggas n 2011 d-yebda ucerrig gar tesqamuyin n temnaḍin-nni n Yimaziγen akked leḥkum-nni n ilaḍil n tmurt n Libya. Ugin yineggura-a ad stεerfen s yisutar n Yimaziγen n Libya. Imi am win iheddren i uεezzug, nnejmaεent temnaḍin-agi fran-tt ad slemden tamaziγt anda akk ttmeslayen tutlayt-a. Akka, dγa, i yekcem uselmed n tmaziγt s aγerbaz deg useggas n 2012. Ma d ass aneggaru n useggas 2012, nnejmaεent akk tesquma n tamiwin n Yimaziγen u mmsefhamen ad rren yennayer d ass n tmeγra taγelnawt di Libya. Am wakken i d-heggan yiwet n tmeγra n ccna ass n 13 deg yennayer 2013 di tmanaγt anda ara cnun kra n yicennayen imeqqranen, gar-asen Takfarinas.
Hocine. M