Ungal d win yettḥaraben ɣef umezruy, tutlayin d wansayen n iɣerfan. Ungal d win d- yettawin awal ɣef tmusni, idles, tayri,tamuhqranit, imennuɣen di lewqat n ṭṭrad, iḥulfuyen d tabɣest n yegduden. ɣef wayagi d wayen nniḍen, timura n lɣerb fkant-as azal d ameqran i tektabt. Ɣurṣen mi d-yeffeɣ wungal, taɣamsa ad d-ger iman-is ɣer wennar akken ad tesqerdec tutlayt-is d tektiwin d-yewwi. Dɣa d ayagi i yettaken azal i tektabt. D ayagi i tt-yettaǧǧan ad teṭṭef deg wemkan-is, ad treṣṣi deg umezruy aseklan (l’histoire littéraire) wad tezger di tsuta ɣer tayeḍ. D ayagi daɣen is- yettenǧaren abrid akken ad teffeɣ di tlisa. Maca akken ad d-yeḍru waya-agi, ilaq ad d-egren iman-nsen wid ara tt-id-isenṭqen s tutlayin nniḍen. Leqdic-agi d win m’uneqqar tasuqilt (la traduction). Taneggarut-agi tessenṭṭeqaɣ-id tamedyazt n ɛumar El Xayyam, Amɣar d yillel, Le vieil homme et la mer, n wemyaru amarikani yewwin araz n Nobel n tsekla Ernest Hemingway, Aqcic aberkan, Black Boy n Richard Wright, Roméo d Juliette n William Shakespeare, Lmektub n Paulo Coelho…Tasuqilt tenǧer abrid daɣen i wungalen n yemyura-nneɣ akken ad f ɣen ɣer tmura nniḍen w’ad ttwaɣren s tutlayin tijenṭaḍ. D tagi i yeǧǧan “Mmi-s n igellil” n Mouloud Feraoun ad yettwaɣer s tmaziɣt, s taɛrabt,s tegnizit, s tespenyulit,…
Maca anerni n teknulujit yesseɣli-yas azal i tektabt. “D tilizrit i yesbaɛden imdanen ɣef tɣuri. Deg wasmi d-usa deg useggas n 1960 i yebda wazal n tektabt yettuɣal ɣer deffir», id d-enna Sylvie Octobre, d tasenmattit ( sociologue), deg weɣmis”Le point”mi d-ewwi awal ɣef sebbat i yeǧǧan imdanen ladɣa inelmaden ad rren aḍar ɣef tɣuri. Isenmattiyen, ineɣmasen, imḍebren n tdukliwin d ineɣlafen n yedles n tmura n lɣerb ikcem-iten uɣilif. Deg wasmi walan d akken taɣuri ur teṭṭif ara amkan tesɛa zzik, sǧehden leqdic-nsen akken taktabt ad tḥareb ɣef wazal-is.
D’agi, ɣur-neɣ, aɣbel ur yekcim yiwen. Ungalen, timkerḍiyin (les bibliothèques) ur jebden-t ara tamuɣli n imḍebren teɛna temsalt. Nutni s timmad-nsen ud d-edhin ara akken ad sḥemlen-t i yelmezyen taɣuri. D tidett, yal taɣiwan-t sbedden-as timkerḍit, maca amur ameqran deg-sent mazal medlen-t tewwura-nsent. Ulac leqdic. D’astehzi-agi imḍbren n yedles i yefkan tawaɣit meqren i wengal. D nutni i ykemlen ahuddu i wayen yellan ihud.
Zenia Thiziri