Atan ad d-yezzi Yennayer nniḍen, yennayer i deg ur yettilli ara yid-nneɣ Umnay n Tlelli: Brahim Izri.
Brahim Izri, anaẓur i d-yernan inzizen-is n tafat i ccna d yidles aqbayli. Tafat i wakken ad d-nifrir ger leǧnas. Tafat i wakken ad nwali abrid n tlelli, abrid n yizerfan n tmeṭṭut, abrid n teqbaylit ur nettṛuẓu ur nkennu,….Seg zzaweyya i yebda abrid n ccna, ɣer-s i d-yuɣal ad ɛfun yeɣsan-is s leɛnaya n wid-s, s lhiba n wedrar n Ǧerǧer ara t-id-yettqabalen akka i lebda. Adrar ara yesemliliyen tamuɣli n Brahim Izri, Meɛtub Lwennas, Mulud At Mɛemmer, Imeɣrasen n tefsut taberkant,……. Am akken ara yezgu ccna d ṣṣut-ik d yiwet seg tgejda n yidles-nneɣ; Ur nzemmer ad nettu ibeddi-k ar watmaten-ik di tizi n ṭṭiq. Di tefsut taberkant mi ɣellin yelmeẓyen am yiɣedduyen, tesbeddeḍ-d Tidukla n Itaksiyen (taxi) Iqbayliyen n Paris. Tefkam-d tayett i Umussu n Leɛrac i yettqabalen nnger i d-yeɣlin ɣef tmurt n Leqbayel. Ass-a ad d-nesmekti belli di 2001 d Brahim Izri i yellan ɣef Uqerru n ugraw i yerzan ar Genève ad ccetkin i l’ONU ɣef twaɣit i xedmen iǧadrmiyen di tmurt, d Brahim Izri i d-yellan i lmendad n “le cortège” n itaksiten iqbayliyen i yerzan si Paris ar Strasbourg akken ad d-rrent tmura agi n luṛuppa lwelha nsent ar wayen ɣ-yuɣen. D kenwi i ibedden i imejraḥ n tefsut taberkant i ikecmen ad dawin di sbitaṛat n Fransa.
Abrid-ik ad neddu deg-s a yiwen seg wid umi isemma Kateb Yasin “Maquisard de la chanson Kabyle”.
Yid-k yid-k a win nḥemmel, yid-k yid-k abrid ad t-nkemmel !!
Agraw n inelmaden n tesnawit Si Lḥasen Uṭaleb Aɣerbaz alemmas Lɣeṛebi At Ɛmer