Deqs n tmeγriwin id-ittewheggan aseggas-a sγur tidukliwin yemgaraden ama di tmurt-nnaγ ama di tmura n lbarani d tmura n tmazγa sumata, ilmend n useggas amaynut n yimaziγen 2964.Dγa tiddukla tadelsant Tiεwinin n taddert n Wizgan, thegga-d yiwen n leqdic s wazal-is, s yiwen n wahil d amesbaγur γef teγzi n 02 wussan, ideg llant temzikniyin yegaraden am ṭṭebqat n wučči i tt-gen imaziγen-nneγ γef demma n yennayer, tiγawsiwin tiqburin, idlisen d ttsawaṛ d waṭas niḍen.Ass n 11 yennayer, i yellan d imensi n yennayer, tella-d sbaḥ temzizelt n tzaburt i yinelmaden n yeswiren amezwaru d ulemmas, syen yella-d yiwen usarag γef umezruy n yennayer id-yefka uselmad n tmaziγt mass Brahim Bessaci. Tamedit n wass tella-d llweεda meqran « imensi n yennayer », anda imezdaγ n taddert n Wizgan fursen tagnitt-agi ideg temlal tasa d way turew.
Ma yella deg ass wis 02, ass n 12 yennayer i yellan d ixef n useggas amaynut imaziγen 2964, tella-d yiwet n temlilit n tmedyazt sγur imedyazen ger-asen, Fahim Messaoudène, Souad Akou, Said Hamoum, Amar Akkou d massa Bellabas n temnaḍt n Wizgan, akken illant 02 n tmedyazin niḍen tigi d Tala n wawal n temnaḍt n Tubiret, d massa Attouchi Assia yiwet n tmedyazt u d tamyarut n temnaḍt iεeẓẓugen i ixedmen ibudan s uzenzu i wedlis-is n tmedyazt. Leqdic d win i ikemlen tamedit n wass, anda id tella usenεet n yiwet n tecquft n umezgun n tarbaεt n At-yiraten. Γer tagara, yella-d tikci n warazen usebγes d igardasen usenmar ikra n wid yukkan di leqdic-agi, xarsum inelmaden yukkan di temzizilt n tzaburt n tmaziγt, i usebγest n tutlayt-nnaγ.
Acu i d yennayer?
Yennayer d ass amezwaru n useggas imaziγen, yebdan lewhi n 590 uqbel talalit n sidna Σisa, aseggas-nni i yerbeḥ ugellid Cacnaq ṭrad i d-yellan gar-as d ifarεunen di Maṣer, mbaεd tagelda tis 22. Yennayer d agur yefilliten i lxir, rrbeḥ, lerẓaq, talwi, imi t-sfuggulen imaziγen. Amek i d-yettili usfuggel n yennayer? Aṭas n wansayen i d-icudden γer yennayer, xeddemen imensi n yennayer neγ llan wid yeqqaren imensi bu sebεa isufar. Zellun iyuzaḍ, dγa zik yal aεeggal s uyaziḍ-is, yernu yal yiwen deg-sen ma yewweḍ 17 neγ 18 iseggasen ad yezlu i yiman-is. Xeddmen lwaεda swayen zemren. Mačči d aya kan, llan wansayen nniḍen am ttesḍila tamezwarut i weqcic amectuḥ akken ad yeğhed ucebbub-is. Xeddmen taswiqt anda aqcic ad yawi aqerru n wezger akken ad yuγal d aqerru n wexxam.
Ihi aseggas-nwen mara d-amegaz i yal amaziγ anda yella, anda yebγu yilli.
Islam Bessaci