Qrib 15 n wussan tura, imsaɣen n tkebbanit n tilifun, ssenf n WLL, ttidiren war tilifun ed internet. Aya yeḍra-d deg tmeddit n wass n lḥed 22 seg yunyu, mi walan wid yettxalaḍen taṭiknulujit seg ttawil-a dakken akcam ɣer internet yeggra-d d awezɣi. Wid terza taluft n uqeɛɛed ur wwin aya d anezgum seg tazwara akken i d-yettban, acku, ur ḥerrken ara s tazzla akken ad frun aɣilif-a i d-yeɣlin deg yiwet n teswiɛt i ur nwulem ara akk, ɣef tmuɣli n waṭas mačči n drus. Ihi, mi nemmeslay akked wid iqeddcen deg Actel n Bgayet nnan-aɣ-d belli ass n lexmis 23 seg yunyu, rzan wid ara yefrun taxsert (la panne) ɣer wadeg, maca imi ur smursen ara (réussir) nnan-d ad d-uɣalen d lḥed bac ad walin tikkelt tayeḍ amek ad kksen aɣbel i yeṭṭulayen yettahda. Maca, ɣef wayen nettwali acemma ur yelli d kra yettsuddu, ulac tamellilt (efficacité), imi imsaɣen merra ẓerren ulac d acu yettbeddilen. «Ɛeṭṭlen aṭas deg ufray n uɣellif-a, i d-yeɣlin deg teswiɛt deg ttmuqulen lɣaci deg internet igemmaḍ n yikayaden n BAC ed BEM». Ay d-yenna yiwen n umsaɣ i tḥuza taluft-a. Seg uɣilif-a, aṭas i yufan iman-nsen ttuḥettmen ad siwlen i yemdukkal neɣ ad rzun ɣer wanda tella internet n lxiḍ, neɣ ad selken taswiɛt s tsura USB n internet, am ooredoo, iwakken ad muqlen i yigemmaḍ n BEM/BAC n tarwa-nsen i d-yuɣalen s nnuba, ussan n 29 seg yunyu ed 02 seg yulyu 2014. Ad nerr awellih dakken iɣilifen-a i yessefqiɛen imsaɣen, i d-yettasen akka war ma yedma-ten yiwen, mačči deg tazwara-nsen ay llan, ma neẓra dakken deg wayyur n yunbir kan n useggas n 2012 tettwakkes lqidar n 30 n wussan, war ma segzan-d ulama d kra wid iqeddcen deg yixxamen n tkebbanit-a n tilifun, imi ula d tafakturt tasinyurt (bimestrielle) n yimir-n, acemma n usenqes ur d-yelli deg-s. Annect-a ahat yekka-d seg telwayt n yemsaɣen ed tdukkli n ur dakkalen ara. Acku lemmer ahat ay d-ttilint tsutriwin neɣ d imsisa (conventions) tili ahat yella wayen i ibedlen. Deg uraǧu n ferru n taluft-a, imsaɣen ttmesteqsayen s wurrif, lḥir, ed tsusmi ar tura, ɣef wamek gan yemrisen (appareils), dduzan, ed lexyuḍ swayes muggen lecɣal-a almi i d-ttnulfayen wuguren seg tikkelt ɣer tayeḍ, neɣ ma d lecɣal i ur nemmug akken ilaq seg tazwara, imi ɣef usiḍen n yisallen i nessaweḍ ad d-nagem, rrwaḥ n internet yekka-d seg ɛeyyu n teska (antenne) i yellan d assaɣ gar-as ed yimudimen n uxxam, ad yili teqdim neɣ tenṭer seg tegras. Ɣef aya ur iban ma ad iɛeṭṭel neɣ ad yeɣseb useggem-ines ladɣa imi ulac aṭas n umeslay ɣef waya.
Mhenni Xalifi