Deg ayen icuden γer lemεawnat id-ittewheggan γef dema n lεid tameqqrant, ddeqs n tdukliwin yemgaraden i yettilin di ttiεad. Dγa tiddukla ASSA, n tadert n Ḥura taγiwant n Wizgan, i iqedcen deg waḥric n tmetti, tjared yiwen n wahil d amesbaγur u swazal-is, anda i ffkan lemεawnat ilfayda n twaculin yenxeṣen i yettewfarqen γef 07 n tudrin n tγiwant n Wizgan. Ger lemεawnat-agi i tefka tiddukla ASSA ass n yimensi n lεid tameqqrant, 20 n waxfiwen naγ n wakraren, lebsa ilfayda n 57 n yemdanen, 50 n teqcwanin yeččuren d isufar n wučči, d 50 kilu n weksum azeggaγ. Tamesbanit-agi d tin i yeskecmen lfarḥ γer wulawen n yimaγban u d tin isen-d-yerran asirem, imi iswi-s d aḥesses n yemdanen γef liḥala yuεren i ttidirent twaculin yenxeṣen, akken tella d tagnit yelhan i uẓeṭṭa n tegmat d tdukli ger yemdanen, u tamesbanit-agi tella-d s ufus n tallelt n yiεarḍiyen d yimawlan n at lxir. Ahil n leqdic d win γezzifen, imi ass n lεid tameqqrant, iεeggalen n tiddukla n tmetti ASSA, xedmen yiwet n tirza n usefqed γer 45 n yimuḍan i yellan di taddert n Ḥura d tudrin id-as-d-yezzin, anda icurken lfarḥ n lεid yid-sen, u sneqsen lγiḍ fell-asen, i wesaḥbiber n yemdanen γef tegnatin yuεren i deg ttidiren imuḍan. Tiddukla n tmetti ASSA n taddert Ḥura taγiwant n Wizgan, d yiwet n tiddukla id-yefkan aṭas i waḥric n tmetti di temnaḍt-agi n Wizgan, imi txeddem tazmart-is akken ad-tesefraḥ yal amdan.
Islam Bessaci