Axxam n leqbayel d azamul n lbadna n tdukkli, d watas n tγawsiwin niden. Xas akken yemgarad di tmnadt γer tayed, ad t-tafed yesɛa yiwet n tγessa, yiwen n wazal. Qqaren-ak : «argaz d taftilt n berra, tamettut d taftilt n daxel» Acku lecγal n tmettut akk deg uxxam, d nettat i t-yesbeddayen, tetteg-as azal, fell-as i tesɛedday leɛmer-is akken ad ibedd wa ad iğğuğeg, axxam icudd γef tmeṭṭut, ma yelha yewqa deg-s lxir d lbaraka, teḥsid d tameṭṭut nni i yelhan ma yewqa deg-s umennuγ d yiγeblan yemmeγ di lḥif, neḥsid d tamettut ay dir, tesdehza deg uxxam-is .
Yal taγawsa deg uxxam n leqbayen tesɛa anamek, seg unnuγen d teqbucin γer iγerban d sqef, γef ayagi i ruḥeγ γer tmurt akken ad issineγ uger γef uxxam aqbayli d wamek yemmug. Mi wwdeγ, tewwi-iyi setti γer uxxam aqdim, mi nekcem γer daγel n ubraḥ, tenna-iyi-d d akken irgazen zik, mi ara ad d-awden γer umdiq-agi , ilaq ad xedmen lḥess ara yeğğen tilawin n uxxam ad heggint iman-nsent, wa ssrent. Nkemmel akin deg ubrid walaγ axxam yedrem , tenna-iyi-d setti akken wagi qqaren-as «axxam n Tmana», tteqsadent mi ara d-tekcem teslit axxam i tikkent tamezwarut neγ mi ara ad d-ilal uqcic, ayagi γef lfal i yesɛa , syen tqubel-iyi-d yiwet n tewwurt s sin n lelwaḥ, tessebrareḥ-itt setti, nekk qqimeγ zdat n umnar, ma d nettat tebda la iyi-d-tettezzi amek yeddes uxxam-is, axxam anda tɛac.
Axxam n leqbayel yebda γef sin yeḥricen: yiwen seg-sen d ameqqran, qqaren-as taqaɛet.ma d wayed mezzi fell-as qqaren-as adaynin.
Taqaɛet neγ agens neγ tiγerγert d adeg anda ttqeggilen wat uxxam.ad tt-tafed teṭṭulem,imi ulac anda ara d-tekcem tafat anagar n yiwen n ṭṭaq amectuḥ anda i d-ikeccem ubeḥri. Tiγerγert tettili texla madi.ur tettafed ṭṭabla wala taxzant wala akersiw, maca tella kan yiwet n tγawsa i yettilin di akk ixxamen : «azetta» wagi yezga-d akkin, γer uγreb i d-iqublen tawwurt. Win i wumi qqaren Tasga «mur de la lumière».ttarran azeṭṭa din imi anagar adeg-agi i d-tettawed mliḥ tafat n yiṭij, aγreb i d-iqublen Tasga qqaren-as «tinebdatin», wagi yezga-d rrif n tewwurt, Tinebdatin akked Tesga d inemgalen,imi Tinebdatin d azamul n tafat, γef way-agi i ttcuddun lferḥ mi ara d-ilal uqcic γer Tesga, qqaren-ak «mi ara d-ilal uqcic ddesent tsegwa» ma d Tinebdatin «mur de l’obscurité» ttcuddun-t γer leḥzen am mi ara yemmet waldeɛad, qqaren-ak «mi ara yeffeγ lmeyyet ttrunt tnebdatin»
Agens deg-s i ttilin lecγal n uxxam: lmakla d usewwi,ides d iγimi.ma tmuqled akin γer tqernit ak-id iban lkanun.ad tafed rsen s ufell-as yinyen deg-s sewwayen yerna sseḥmuyen di tegrest. S nnig lkanun yettili udekkan ttilint daγen tekwatin, rrif-s kan ad ak-id- iban useγwen, seg-s ttɛelliqen lebsel akk d ticcert. Ma tmuqled γer tama tazelmadt yella udaynin.deg-s yettili lmal d tγeṭṭen d tsita, imi wagi d azamul n rrbeḥ.maca adaynin ur yekmil ara srid i usgen tefreq iten yiwet n terkabt, deg udaynin yettili lmedwed deg-s i ttarran lqut i lmal-nni, s ufell-as tella tγimit. Syen tella teɛrict, deg-s ttağğan ikufiyen, wigi ttarran deg-sen rrezq.
Sɣur: Ʃedwan Ʃebdeɣani.