Rẓageḍ ay awal
Deg imi n yirgazen at nnif
Lbaṭṭel aderɣal
Yewwi d di lǧerra-s urrif
Ha-ten la ttgallen s ccwal
Lḥif s adrar id imal
Agujil ad yettiẓẓif
S tidet yerzag wawal, ɣef aya tecceḍ tqamumt n yimru , tuggi leḥzen id tettnawal. Ɣef tikelt lmut tenneḍ i tudrin, tɛedda nnig leḥwaṛi, tezgel afrag, tebded di tesga. Ṛuḥen di sin qṛib afus deg ufus. Iṛuḥ win akken is yeqqaren: “ ma tecfam ay igudar, fell-awen iɛedda lexrif ” , iḍfeṛ-it win akken yettwennissen s tezlit-agi ur nesɛi tamtilt asmi i tuɣ d anekruf deg di lḥebs deg useggas 1964. Akken iṛuḥen lwaḥid Mass Hocine Ait Ahmed akked d Mass Taleb Rabeḥ. Di ccaw ur nufi lḥila i yimeṭṭi, ur nufi abrid i ssbeṛ.
Tenhuz tmurt n leqbayel. Widen yeẓran fren aggas deg iciwwi, wid ur nessin wehmen , imi allaɣ -nsen ur yegzi taluft. Taddart ɛzizen a Michlet tesnehtit taguni arraw-is. Arraw-is yeggullen ur ḥenten ad ksen lhem ɣef udem-is. Xuḍi lhem si zik nessen-it. Xuḍi lhem si zik nxuleḍ-it. D lhem yesfezwin imawlan-nneɣ ɣef timura n beṛṛa, yewwin imawlan-nneɣ deg iberdan n treḍ, d win i mazal ineffu arraw-nneɣ, tiḥdayin-nneɣ akkin d agemmaḍ. D Lhem-nni id yewwin lmut n warrac-nneɣ di tefsut n 80 , di tafsut taberkant. Wisen kan acu iɣ-id yessewjjed akka d asawen.
Iṛuḥ Taleb Rabeh..ttrun-t wallen , jerḥent d idammen. Iṛuḥ Hocine Ait Ahmed, cfan igudar, ẓran lbizan azal n wemdan yellan d ilelli. At wawal ẓran azal n wawal ulamma ass-a rẓag deg imi. At leɛli ẓran ulamek ara yili lbaz d lbaz ma deg yir luḍyat i yettawi. Armi teɛzizeḍ a Michelet id tewwi nneqma tiɣratin. Awal d bab n wawal i t-yennan:
Tilawin adrar n ssbeṛ
Xas iẓri iɛamer
S nneqma bdan-t tiɣratin
Ihi siɣret a taqbaylit s wid id rebbeḍ, ma d win nɣant tismin d awezɣi ur ten yessawaḍ!
Ait Slimane Hamid