I lmend n usmekti n wass aɣelnaw n umeɣras, i d-yettilin yal ass 18 deg waggur n furar..Aṭas n yidisan i d-iheggan ddurt tadelsant i lmend n usmekti-agi. Gar wid itt-id-isuddsen
ad d-nebder: Tanmehla n Yidles, Axxam n Yidles n Tizi Uzzu d umaruz-is n Azazga, Axxam n umezgun Kateb Yacine, s tallelt n temkerḍit tagejdant n tɣuri taɣerfant, akked uslay amniḍan n umeɣras, s lemεawna n tiddukkla n warraw n yimjuḥad, heggan-d yiwen leqdic d ameqqran deg waṭas n yimukan, ɣef teɣzi n 4 wussan, imi yebda ass-nni n ttlata 14 deg waggur furar 2017, yekfa sendiḍelli n sed 18 deg waggur-agi ideg nella. Aseggas-agi, gan-as tajmilt i umeɣra ameqqran Mass Akli Amar. Ma d ahil yettwaxedmen sɣur yimsuddsen-agi d anesbaɣur, imi llan-d aṭas n leqdicat idelsanen ɣef teɣzi n 4 n wussan-agi. Ass-nni n ttlata 14 seg furar 2017, deg temkerḍit tagejdant n tɣuri taɣerfant, yella-d usikew sɣur Massa Cherifi d Mass Semati Med. Ass-nni n lexmis 16 deg waggur-agi ideg nella, deg umaruz n Uxxam n Yidles Mulud At Mεemmer n Azazga, tella-d temsikent ɣef tegrawla tazzayrit (tugniwin, imagraden, idlisen n umezruy…), tella-d diɣen temsizzelt n tmedyazt tagrawliwt. Ma d ass-nni n sem 17 deg waggur-agi n furar, xedmen tirza ɣer usalay n Fatma n Soumer. Am wakken diɣen i d-llant snat n temsikniyin deg Uxxam n Yidles Mulud At Mεemmer n Tizi Uzzu; tin n tegrawla tazzayrit (tugniwin, imagraden, idlisen n umezruy…) akked d tin n yidlisen n umezruy sɣur tazrigt El Amel. Ma deg wass-nni n 18 di furar, deg tzeqqa n temsikniyin n Uxxam n Yidles Mulud At Mεemmer, llant-d diɣen snat n temsikniyin, ama d tinna n tegrawla, ama d tinna n yidlisen n umezruy. Ma deg tzeqqa tamecṭuḥt n umezgun, tella-d temsizzelt gar yiɣerbazen imenza, akked tmeɣra tadelsant akked tẓuri i usfukel n wass n umeɣras. Llant-d diɣen tnagiyin n yimjuhad d yimeddukkal d twacult n umeɣras-agi ameqqran “Akli Amar” iwumi tuɣal tejmilt aseggas-a. Ma deg uxxam n umezgun Kateb Yacine n Tizi Uzzu, yella-d usenεet n yiwet n tceqquft n umezgun, sɣur tiddukkla tadelsant “Tala” n Draa Ben Kheda, s yisem n “Ḥsen Amugad”. Ma deg tzeqqa n ssinima n Tizi Uzzu, yella-d uskan n usaru-nni n “Lbir” n Loutfi Bouchouri.
Ghani Amazigh