Iẓi (vésicule biliaire) iseḥḥan, ilaq ad yili di tfekka. D acu kan imi iẓi d tacekkaṛt tameẓyant yettilin ddaw tasa, ddeqs n yimdanen ur ẓrin ara tella, u tesɛa azal ameqqṛan. Iẓi yezmer ad yili d amkan n tlalit n yiẓra yeṭṭuqqten ugar ɣer tlawin yesɛan gar 20 d 60 n yiseggasen. Ɣef waya, issefk fell-aɣ ad nissin ccirat n waṭṭan-a.
Acu n wazal yesɛa yiẓi?
Iẓi d tacekkaṛt tameẓyant yettilin ddaw n tasa, teččur d imirẓig ( bile) i d-itekken seg-s. Tessurug-it deg yiẓerman s ttawil n targa n yimirẓig akken ad yishil usefsi n tassemt deg-sen.
Anwi imdanen yettḥaz ugar waṭṭan n yiẓra n yiẓi?
Ttilin yiẓra n yiẓi ugar ɣer tlawin yesɛan gar 20 d 60 n yiseggasen labeɛda tid yellan s tadist neɣ tid itessen tihurmunin yecban tiɛeqqacin n uḥbas n dderya. Imdanen yesɛan aṭṭan n sskeṛ neɣ tuzert, wid itetten učči yeččuren d sskeṛ neɣ d tassemt, s umata, nettaf iẓra deg yiẓi-nsen. Tikkwal, aṭṭan-a, nettaf-it ɣer ddeqs n yimdanen n yiwet n twacult. Ɣef waya i d-tbeggen tussna dakken llan yiẓra n yiẓi yettawraten.
Acu-tent ccirat n waṭṭan-a?
Acuffu n tɛebbuḍt akked d uṭuqqet n lgaz : Aya icudd ɣer lexsaṣ n usefsi d uqzam n tassemt. Imi, iẓra yellan ama deg yiẓi ama deg targa čeṭṭinen asureg n yimirẓig deg yiẓerman.
Amɛuqqu akked tuzzya n leɛqel : labeɛda di ttnaṣfa n wass, snat n tsaɛtin deffir telqimt.
Aqraḥ deg uɛebbuḍ, azagur akked yiɣallen, labeɛda si lǧiha tayeffust : imi neẓra dakken iẓi yusa-d ddaw tasa yellan si tama tayeffust deg uɛebbuḍ. Ɣef waya, ilaq amdan, ad yettara lewhi-s ɣer uqraḥ-a ma yeqqim ugar n 15 n tedqiqin.
Lembwaser (hémorroïdes) akked uberriḍ.
Sawraɣ (ictère) : d aɣbel ameqqṛan imi ccira am ta, tettbeggin-d dakken iẓra regglen targa n yimirẓig. Aneggaru-a, yettawi abrid-nniḍen deg yiẓuran n yidammen, d aya ara yefken init awraɣ ama i uglim neɣ i wallen.
Tawla d yimi yettfuḥun : ma qqiment ccirat-a ugar n 10 n wussan, ilaq amdan ad inadi ɣef sebba imi tezmer ad tili d aṭṭan-a.
Iẓi yezmer ad yili d amkan n tlalit n ddeqs n yiẓra yeṭṭuqten aṭas ɣer tlawin. Aṭṭan-a yeslalay-d ddeqs n wuguren. Yessefk ɣef yal yiwen ad yissin ccirat-ines akken ad as-yekker ɣef zik lḥal uqbel ma yegla-d s wayen meqqṛen yecban tamsalmit neɣ azzug n yiẓi.
Salima Dali