Iḍelli n lhed ɣef 10h n sbaḥ i tebda s wudem unṣib tezrigt tis tmanya n Tfaska “taɣuri deg tmeɣra”, deg temkerḍit tagejdant n tɣuri taɣerfant n Tizi Uzzu. D leqdic i d-thegga tenmehla n yidles ɣef teɣzi n ddurt, imi tebda iḍelli 26 deg meɣres ad tekfu ass n sebt amenzu deg waggur n yebrir. Ad d-tili tezrigt-agi deg 6 n yimukan n yidles d tmussni deg wakal n lwilaya n Tizi Uzzu yecban: Axxam n yidles Mulud Mɛemmeri d Umaruz-is n Azazga, tamkerḍit tagejdant n tɣuri taɣerfant, Axxam n umezgun amniḍan Kateb Yacine, Tazeqqa n ssinima, Ulmis adelsan Matoub Lounes n Ain El Hemmam. Yettwahegga-d yiwen wahil d amerkanti, ideg ara d-tili rrehba n yidlisen (timsikniyin sɣur 20 n tezrigin, d isenza s yibuddan sɣur waṭas n yimura), ama deg Uxxam n yidles ama deg Umaruz-is n Azazga neɣ deg Temkerḍit tagejdant n tɣuri taɣerfant, seg 9h n ssbaḥ alamma d 16h n tmeddit ɣef teɣzi n ddurt, d usenɛet n yimuhal n yiskiwen n yilmisen-agi. Ad d-ilin daɣen sin n yisaragen deg Temkerḍt tamaynut n Tizi Uzzu, ussan n 26 akked 27 meɣres. Ad ilin diɣen waṭas n yisikwan (uraren isegmiyen, asuneɣ, timucuha d teḥkayin) deg temkerḍt-agi tamaynut. Ma deg Uxxam n yidles n Tizi Uzzu d Umaruz-is, ad d-ilin waṭas n yisikwan-nniḍen yecban: asnulfu, tira mebla tilisa (s tamaziɣt, s tefransist d taɛrabt), asuneɣ, tullsa d tira n tmucuha…atg. Am wakken diɣ ara yili useḥḥar d imseḍsi, ama deg Uxxam n umezgun Kateb Yacine ama deg Uxxam n yidles n Tizi Uzzu d win n Azazga. Ma deg tzeqqa n ssinima, ad yili ass n 27 deg meɣres, usenɛet n yiwen usaru s uzwel “Les Aventures de Tintin”, ma deg Ulmis adelsan Matoub Lounes, tella-d turart tcequft n umezgun “La Cigale et la Fourmi” sɣur tiddukkla “Itri Areggal” n D B K. Ass n umenzu n waggur n yebrir, ad d-tili tmeɣra n taggara deg uxxam n Yidles Lmulud At Mɛemmer, ideg ara ttunefken yigerdasen n uttekki i yimekkiyen deg tfaska-agi, d warrazen i warrac ara d-yifriren deg yal asikew.
Ghani Amazigh