I lmend n wass aɣelnaw n yimeɛḍar i d-irezzun yal 14 deg wayyur n meɣres, aṭas n tdukkliwin i igan leqdicat igerrzen. Deg temnaḍin yemgaraden deg tmurt, llan wid yesfuglen ass-nni deg wass-is, llan wid i t-yessihlen seld mi zrin fell-as kra n wussan. D annect-n dɣa i tga Tdukkla n Yimeɛḍar n At Mensur Afus Iserrḥen, n twilayt n Tubiret, di tazwara n ddurt iɛeddan. Tiddukkla-a i d-ilulen deg taggara n 2014 i wakken ad teqdec i lfayda n yimeɛḍar n taddart-nsen, ur tunif ara i ttiɛad-nni, ur t-teǧǧi ad ifut war ma texdem leqdic-is. Ahil i d-yellan deg tmeɣra-nni d anesbaɣur seg yal tamiwin n uheggi. Mbeɛd tigawin timezwura n userḥeb s yinebgawen d uttḥesses i yimseɣret (hymne) aɣelnawn metwal ttesɛa n tnezzayt, tettunefk tegnit i uselway n tdukkla n tɣiwant n At Mensur Mass Rabiɛ Bacuc ad d-yini awal-is i wid iḥeḍren. Syin, d limam n lǧameɛ Mass Bumeqwaz Farid i d-yennan ula d netta awal-is i yimeɛḍar i tuɣ dinna. Deffir wawalen n uselway d limam, tewweḍ-d nnuba n umezgun d tmedyezt d urmuy (monologue), s tceqquft n umezgun i d-turar terbaɛt Ixulaf, d yisefra i d-yewwi Mass Ɛadel Bacuc i yimeɛḍar akked urmuy sɣur Mass Ɛli Merzuq. Iɛeggalen n tdukkla n yimeɛḍar fkan 113 n warrazen i yimeɛḍar s tɣawsiwin iwumi tteḥwiǧin am tkalicin, tiḥuyak, tisumtiwin n nnefs&hellip,; atg. Terna tbudd 67 n tangiwin i wid i asen-yefkan afus n tallelt akken ad yemmag ttiɛad-nni, d kra n yinebgawen iberraniyen i d-yerzan seg yidigan yemxalafen. Gar-asen tanemhalt n DAS Massa Saliḥa Ḥerkat d kra n wudmawen nniḍen. Mi qrib ad yekfu wahil dayen, yefka-d uselway n tdukkla, i tikkelt tis snat awal-is n taggara. Ma d tigawt taneggarut metwal 13:sr d iɣimi i tuččit n yingulen d tissit n tgazuzin. «Iɛedda akken iwata ttiɛad i d-nhegga. Numer aṭas imi d-iban lferḥ deg wudmawen n yimeɛḍar, acku d win i d iswi-nneɣ. Numer daɣen imi aṭas n yinebgawen i d-nenced ama seg tɣiwant-nneɣ, neɣ seg berra, rran-d i tiɣri». I aɣ-d-yenna Mass Ɛadel Bacuc, yiwen seg yiɛeggalen n Tdukkla n Yimeɛḍar n At Mensur. Ad d-nebder kan dakken leqdic n tmeɣra-a iwennɛen, mmeslayen-d fell-as ula deg umaṭṭaf n Tubiret, i yellan dinna akken ad d-yessaweḍ srid isalli i yimsefliden. Anda i d-yemmeslay uselway n Tdukkla d kra n yiɛeggallen-is. Afud ijehden i Tdukkla n Yimeɛḍar n At Mensur Afus Iserrḥen.
Kaisa Khalifi