Sendiḍelli n ssebt 13 deg maggu 2017, i temdel tiwwura-s temsikent n tewllafin tifuṭugrafiyin n Mass Mahammed Attaf, iwumi yefka asentel «Lezzayer n Tafat». Tella-d temsikent-agi deg tzeqqa n temsikniyin n uxxam n yidles Lmulud At Mɛemmer n Tizi Uzzu, tebda ass-nni n letnayen iɛeddan 08 maggu, tekfa sendiḍelli tameddit n wass. Am wakken diɣen i d-yella usenzi s ubuddu n yidlisen-is, dima deg tzeqqa n temsikniyin. Ad d-nesmekti belli, Mohammed Attaf d amaru n waṭas n yidlisen yecban: ungal “aseklu n zzher” iwumi isemma netta “L’Arbre de la chance”, d wammuden tullisin “Tasusmi n leḥyuḍ” iwumi isemma netta “Le Silence des murs”, d wammud n tmedyzt “ijeğğigen n yiman-iw” iwumi isemma netta “Les fleurs de mon âme”…
A. A.