Accueil Tamazight Iseɣrez amaynut n Kaci Ifaraten

Ajdid deg ccna

Iseɣrez amaynut n Kaci Ifaraten

703

Mbeɛd amezwaru-ines i d-yeffɣen ɣur teẓrigin Tamazɣa, deg useggas n 2014, yessufeɣ-d ussan-a iɛeddan ucennay Qasi Ifaraten, mmi-s n temnaḍt n Buɣni, aḍebsi n ccna wis sin ɣur teẓrigin Yen Music. Iseɣrez-a amaynut, yewwi mraw n tezlatin s wawalen yemgaraden, ama deg tmeɣrut neɣ deg talɣa, d kra n yisental i yeqqen wa ɣer wa. Ma nmuqel-d i yizwal n tezlatin-nni, ad negzu kan ɣef wacu i d-ttmeslayent, maca ma yesla-asent yiwen, ad yefhem d anwa izen i yebɣa ad yessiweḍ ucennay i yimdanen, d wamek yettwali netta kra n tlufa. Deg tezlit tamezwarut iwumi isemma “Aḍar ɣer sdat”, d tezlit tis 5 iwumi isemma “Yeḥfa yiẓri-w”, yettcektay-d Qasi Ifaraten s uɣiḍi ɣef yir addad ideg i d-ggran watmaten-is Izwawen. Iban-d d win yesḥassfen daɣen s waṭas ɣef kra n ubeddel i d-yellan gar yiḍelli d wass-a d ɣef wansayen n tjaddit i yettruḥun. Tezlit tis 9 i umi isemma “Nufa anda truḥ”, ur yebɛid ucennay ɣef taluft n ucekti, maca s tɣara-nniḍen i d-yemmeslay. Deg-s yebder-d tamentilt n lḥif i ttidiren Yiqbayliyen, mi yenna:

Nufa anda truḥ Gar lluban akked uǧilban Muḥ yerfa ɣef Muḥ Ixeddem lfayda ur tban Mazal-it mecṭuḥ Aqerru-ines d aciban Γlin-as wuglan…

« Ayen xedmeɣ deg uḍebsi-agi amaynut, icuba wid iɛeddan; s wul i cennuɣ ama ɣef teqriḥin i nettwali di tudert n wiyaḍ, ama ɣef tid i nedder, neɣ ɣef wuguren n tdukkli di temtti-nneɣ ». I aɣ-d-yenna ucennay send ad ikemmel: « Ssarameɣ ad yehwu i waṭas n wid ara as-yeslen. D win i d iswi-iw ameqqran ». Aṭas n yimeslayen ara isel win yettḥessen i yiseɣrez n Qasi Ifaraten i yecna s uɣanib n cceɛbi. Ideg yesseqdec tirmit i d-yesɛa deg umecwar-is aɣezfan i d-yelḥa seg wacḥal d aseggas tura. Dɣa, yewwi-d ad d-nesmekti d akken acennay Qasi Ifaraten yella deg yiseggasen n 80 deg Ugraw Ifaraten i yettwassnen zik s yismawen n wid yellan deg-s. Gar-asen amaẓwan Salem Qerruc d wiyaḍ. Maca kra n teswiɛt msebḍan, yuɣal icennu i yiman-is imi iḥemmel ccna.

Kaisa Khalifi