I lmend n usmekti n umulli wis 38 n tefsut n yimaziɣen (20 yebrir 1980) akked umulli wis 17 n tefsut taberkant (20 yebrir 2001), yettwahegga-d wahil d anesbaɣur ɣef teɣzi n ddurt deg taɣiwant n At Leqsar itabaɛen ɣer lwilaya n Tubiret. Ad yebdu wahil-agi seg uzekka n ttlata 17 yebrir 2018, deg Uxxam n yilmeẓyen Xiṭus Ḥemmu deg taddart n Acir, yellan deg tɣiwant n Wat Leqsar. Ad d-ilin deg-s sin-agi n yirmad igejdanen; rreḥba n udlis, deg tezrigt-is tamezwarut akked tfaska taɣelnawt n tmedyazt tamaziɣt, deg tezrigt-is tis tlata.
Tafaska taɣelnawt n tmedyazt tamaziɣt
D ttiɛad i ttraǧun ddeqes-aya yimedyazen d tmedyazin wat yiles amaziɣ. Yetturaǧu ad ttekkin ugar 77 n yiḥeddaden n wawal d wid yettewzanen awal deg usefru, deg tazrigt-agi tis tlata n tfaska taɣelnawt n tmedyazt tamaziɣt. Ad d-tili aseggas-agi, seg lexmis 19 alamma d ass n ssebt 21 yebrir 2018, deg Uxxam n yilmeẓyen Xiṭus Ḥemmu deg taddart n Acir. Imedyazen-agi, ara yettekkin, ad d-rzun seg waṭas n lwilayat n tmur n Lezzayer, gar-asent: Tizi Uzzu, Bgayet, Tipaza, Bumerdas, Tubiret, Xennecla…atg. Am wakken daɣen yetturaǧu ad yili uttekki n 8 imedyazen Imarrukiyen, yettmeslayen tantala tarift. D ayen ara d-yefken leḥsab n 85 n yimedyazen d tmedyazin ara yemḥezwaren ɣef 10 n warrazen imenza, ara d-yettwifernen sɣur teseqqamut-agi n uktazal: Mass Gemmar Mbarek d aselway, ma d Massa Munya akked Massa Ben Ɛissu d tiɛeggalin di tesqamut. Xemsa n warrazen-nni imenza ad ilin d arrazen imeqranen, ma d xemsa-nniḍen n usebɣes n yimedyazen.
Rreḥba n udlis n Leqsar
Azekka tasebḥit 17 yebrir 2018, ad tebdu tezrigt tamezwarut n rreḥba n udlis n Leqsar, ara d-yilin ɣef teɣzi n tlata wussan. Ad tekfu rreḥba-agi ass n lexmis 19 deg waggur-agi ideg nella. D ttiɛad adelsan meqqren, ideg yetturaǧu ad kkin wazal n 30 n yimura imaziɣen, ara yessenzen idlisen-nsen s ubuddu. Ad ilin yimedyazen ara d-yawin ammuden-nsen n tmedyazt, gar-asen: Ḥsen Maric, Yidir Bellali, Muḥend n At Abdella…atg. Ad ilin diɣ yineggalen yecban Ali Ḥeǧaz, Racid Ulebrir, Farida Saḥwi…atg, am wakken daɣen ara d-ilin yimura n tsstin-nniḍen deg ttiɛad.Yetturaǧu, diɣ, ad d-ilint temsikniyin n yidlisen neɣ timsikniyin n usenzi sɣur 10 n tizrigin, ad nebder gar-asen: Richa Elsam, La Pensée, Tafat, Ḥurufi Lmufaḍala, Asirem. Ad yili diɣ wahil n yisaragen ara yeddun ɣef teɣzi n sin wussan, ad yeddu akka: I uzekka, ad d-ilin sin n yisaragen. Amezwaru ɣef 10h00 sɣur Mass Ǧamel Laseb, wis sin ɣef 15h00 sɣur Ṭarik Ǧerrud. Ma d seldazekka n larebɛa 18 yebrir, ad yili usarag n Mass Saɛid Cemmax ɣef 10h00. Ɣer taggara, ad nesmekti, belli leqdicat-agi idelsanen ad d-ilin tikkelt-agi d tajmilt i 7 yimeɣrasen n tmaziɣt, yecban; Mulud Mɛemmri, Matub Lwennas, Muḥend Arab Bessaɛud, Sliman Ɛazem…atg. Ad d-nesmekti s tddukkliwin tidelsanin i d-iheggan leqdic-agi: Tiddukkla tadelsant Amaziɣ, s tallelt n tddukkliwin Tafat, Talwit, Tadukli akked tiddukkla Leḥsan.
Ghani Amazigh