Iberreḥ-d ussan-a iɛeddan Uxxam n yizerfan n umeskar d yizerfan inaragen (ONDA) s yigemmaḍ ineggura n tefranin i d-yessuddes, taggara-a, i ufran n yiɛeggalen n Useqqamu n tedbelt. Deg wulɣu dɣa i d-yessufeɣ i tɣamsa d uzayez, ufraren-d gar wiyaḍ sin n yinaẓuren yettwassnen si Bgayet, Buǧemɛa Agraw akked Ɛemmur Ɛebdennur, ara yilin ihi deg useqqamu-a n tedbelt alamma d tifranin i d-iteddun. Aseqqamu-a, d win ara yettɛessan ɣef wayen yerzan tilufa n unaẓur d ufraq n yizerfan n umeskar. Ad d-nesmekti d akken llant-d tifranin ɣef sin n yiberdan mgaraden. Yiwen n ubrid s ttawil n internet, deg wadeg web n uxxam-a, seg 10 armi d 12 unbir. Ma d ttawil-nniḍen, d isendyaq n tefranin i d-yersen deg tnariyin (lbiruyat) yemgaraden n ONDA, seg 12 armi d 14 n yiwen wayyur. Ɣef wamek i d-yewwi wulɣu, akk tarrayin-a n tefranin, ulamma mačči aṭas i yekkin deg-s, llant-d s uḥḍar n llusi n teɣdemt, «D tidet, ffɣeɣ-d deg tefranin-a deg umḍiq wis sin deffir Amur Abdennur», i aɣ-d-iwekked unaẓur Buǧemɛa Agraw. Send ad d-yernu: « Ad snemmreɣ akk wigaḍ ivuṭin fell-i. Tura deg useqqamu-a n tedbelt, ad neɛreḍ ad d-nawi rray-nneɣ i lfayda n unaẓur d tẓuri. Ahat ad nettemlil tikkelt i wayyur neɣ i sin akken ad nemmeslay ɣef lecɣal n yizerfan n umeskar d tẓuri s umata». Ma nebder-d taggayin-nniḍen, ad naf ttwafernen-d din wiyaḍ, am Racid Mesbaḥi si Lezzayer. Ma d amḍan amatu n yiɛeggalen n useqqamu-a, yewweḍ ɣer 12.
M. K.