Deg tdiwennit-a, newwi-d awal akked Younes Boudaoued ɣef umecwar-is deg ccna akked ssinima.
Aɣmis n Yimaziɣen: Amek i tebdiḍ amecwar-is di ssinima ?
Younes Boudaoued: Tazwara, tusa-d kan akka ur d as-heggaɣ ara. Imi nella neqqim nekk d yiwen umeddakkel , dɣa yenna-id: ‘’Ayen ur tettaraḍ ara les clipes-agi-inek d isura?’’. Dɣa seg yimir-n tebda tikti-a tkeccem i deg wallaɣ. Syin nniɣ-as ayen ala. Xedmeɣ kra n usileɣ deg useḍru ama dagi di Fransa , ama di tmurt n lalman. Syin, suffɣeɣ-d isura s teqbaylit, gear-asen : Wejṭuṭi , Tenna-iyi yemma , Axxam n mmi…
Mass Boudaoued d acennay daɣen…
Ih, cennuɣ, xedmeɣ tizlatin anda i sɛeddayeɣ izen s yiwet n tarrayt yesseḍsayen. Ḥku-aɣ-d ɣef tezlit n Wardiya n 13 Tizlit-a, wwiɣ-tt-id seg umezruy n tmurt n leqbayel. Tagi d yiwet n teqsiḍt n tmeṭṭut i d-yusan si tama-nni n Uqbu ɣer dagi ɣer Usqif n ṭṭmana. Txeddem deg usensu isem-is Transatlantique , tettwahqar , ttasmet seg-s tiqcicin n taddart. Syin ssawalen-as wardiya n treiz , akka ihi i d-xedmeɣ taqsidt-agi d tizlit
Ma tebɣiḍ ad d-nawi awal tura ɣef Tfaska n usaru amaziɣ deg Fransa…
Tafaska-agi tella d tilellit, d tiddukkla tadelsant Faḍma N Sumer i tt-id-iheggan, anda i nger tiɣri i wid yesɛan isura s tmaziɣt di tmura n tmazɣa akken ad ttekkin deg temsizzelt-a. Syin, teḍra-d tfaska-agi deg waggur n tuber di tmurt n Fransa, anda i d-ussan wid i itekkan deg temsizzelt , ama si tmurt-nneɣ ama si tmurt n Lmaruk. Arraz n usaru ifazen yuɣal i Hocine Tahiri s usaru Aberray si tmurt n Lmaruk. Yuɣal warraz n usebgar ifazzen i Zahia Ezahiri. Ma d tira (asinaryu), yewwi-t Mohamed Rahal. Bɣiɣ daɣen ad d-iniɣ belli asinaryu i d-yexdem Mass Djamel Kacher igarrez, maca aɣbel i d-ufan wid ifernen deg temsizzelt, d akken llan yiɣawasen n dir, dɣa kukran akken ad as-yuɣal warraz. Maca, ad d-iniɣ d akken asinaryu yelha, syin yuɣal warraz i Muḥemed Reḥal. Asebgar ifazzen, isuḥ-d Mass Rabaḥ Yaɛbaden deg usaru “Selyuna”.
D acu n yiɛewwiqen i yellan deg ssinima amaziɣ ?
Tamezwarut d tadrimt , ulac win ara d-iɛawnen isura. Ad nernu, daɣen, di tmurt-nneɣ ur ttaɣen ara isura. Syin, ad naf di tiliẓri acḥal d lesnin, aṭas n yisura i d-yettɛeddin, meɛna ur ttwaxellaṣen ara. Tura, qqaren-d ilaq d kunwi ara d-inadin tadrimt akken ad yeddu usaru. Di timetti-nneɣ, urɛad i faqqen akken ilaq i tarrayt n uspunsur, acku mazal ɣilen aseḍru (asufeɣ), d asɛeddi n lweqt kan, neɣ d urar kan. Ur zrin ara d akken amsuffeɣ d yiwen i d-yessufuɣen , yeḥwaj win ara t-iɛawnen. Aɛewwiq ameqqran i nekni d lemɛawna n wid yettwalin ssinima amaziɣ akked wid i t-yeṭṭafaren. Ma yella agdud ur yettwali ara ayen i d-nessufuɣ , ma yella imawlan ur ttawin ara dderya-nsen ɣer tzeɣwa akken ad walin ticeqqufin n umezgun, d isura-nniḍen, nekni ttruzun-aneɣ ifadden s wanect-a, dɣa din i nḥebbes. Bɣiɣ ad xedmeɣ tiɣri i tddukkliwin akken ad xedment ahilen, am umedya : ad sɛeddayent isura imaziɣen yemxallafen. D ayen ara yefken afud i wid ixeddmen di taɣult-a n ssinima akken ad ikkemel, mačči kan d aya imi s usaru, s umezgun agdud ad yissin ama d tutlayt-is ama d idles-is. Maca akken ttwaliɣ di tmurt-nneɣ, tiddukkliwin,tencadent-d icennayen kan , ttaken-as aṭas azal i wayen ukk yeɛnan ccḍeḥ, ttun d akken yella ssinema, tella temedyazt. Ma yella nexdem amgarad gar ssinima di tmurt n lmaruk akked tin n tmurt-nneɣ, ad naf d akken s waṭas i d-aɣ-ifen, ulac tiddukkla ara ixeddmen tameɣra ur d-txeddem ara asaru. Maca ɣur-nneɣ ulac anect-agi , ḥemmlen yakk ad d-addren Muḥya maca qqlilit tddukkliwin i ixeddmen taceqquft n Muḥya. Xedmeɣ tiɣri i tddukkliwin ɣef wanect-a, maca ala snat i yi-d-yerran awal : Tiddukkla n Tqerbust akked tiddukkla deg Yiɛezzugen .
Ma yella nuɣal-d ɣer usaru Axxam n mmi. Tenniḍ ussan iɛeddan ur t-tettkemmileḍ ara. Ayen ?
Nufa-d aspunsur , maca aɣbel –nneɣ deg tedrimt, imi ma yella yefka-ak-d uspunsur tadrimt swayes ara yeddu usaru , ddewla ad tawi 12% seg uspunsur. Rnu-as, tafzert, ad awin 20%. Anect-a, ttawin-ten si raselmal. Syin, ad ternuḍ ayen yakk ara tserfeḍ ɣef usaru, ad d-tafeḍ iman-ik ur terbiḥed ara. D ayen i yi-yeǧǧan nniɣ-d d akken ur ttkemileɣ ara asaru n Uxxam n mmi. Ad rnuɣ ɣer wanect-a mi ara d-yeffeɣ usaru , neɣ tizlit, les CD ur ttnuzun ara imi Youtube tura yerza-aɣ. Aṭas n wid i yettawin ayen i d-nessufuɣ, xeddment dinna s yisem-nsen. Rnu, wigi imfarasen (les producteurs) i d-yeqqaren yenɣa-aɣ le piratage, nutni s timad-nsen snuzun s 50 DA 100 n tezlatin .
Yella kra n usenfar i d-tessewjadeḍd sya ɣer sdat ?
Tura ur cukkeɣ ara , ma yella nufa-d aspunsur ad d-nessufeɣ , ma yella ulac aqlaɣ neqqim.
Awal-ik n taggara…
Ad d-iniɣ d akken tafaska n usaru amaziɣ d yiwet n tfaska tilellit, acku aṭas i iɣillen d akken tafaska tesɛa assaɣ akked MAK, dɣa bedden-aɣ-d d iɛewwiqen. Nekk ass n wass-a, ad iniɣ belli nekni iswi-nneɣ d idles amaziɣ, nexḍa i tsertit, nexḍa i skra yesɛan assaɣ akked ikubar yemxallafen. Nekni d tiddukkla i d-iheggan tafaska , akken ad d-nejmaɛ isura imaziɣen si tmura n tmazɣa , ur nxeddem ara tasertit, maca d yidles akked tmaziɣt daya kan .
Testeqsa-t Yamani Souhila