Ssuq n Lḥed i d-yezgan di tɣiwant n Timizart di la daira n Wagnun, ur tefki anzi i temdint ur teqqim d taddart. I taggara-ayi, simmal yettnerni lebni deg-s, simmal tettimɣur. Yuɣal umdan ayen yettnadi yezmer ad t-id-yaf din deg umkan: Ggtent tḥunna, llan azal n tlata n yifarmasyanen, yiwen n dispensaire, aɣerbaz alemmas d tesnawit, sin n les cybers-café i iteddun s ttawil ADSL, aṭas n leqhawi akked les restaurants. Lḥasun, ayen i tnudaḍ ad t-tafeḍ. Awi terreḍ,; tifurgunin ur ḥebbesent ara.
Limmer d lebɣi, Ssuq n Lḥed (din i yella uxxam n tɣiwant) ad yilli yesεa udem n temdint. Meεna, win ara d-yerzun ɣer din ad yettewhem deg wayen ara qablent wallen-is. Ar ass-a, ur llin itruṭwaren i ubrid awḥid i igezmen Ssuq n Lḥed si ṭṭerf armi d ṭṭerf. Deg wussan n ugeffur, abrid-agi yettuɣal merra d ixmir, alarmi ulamek ad εeddin yimdanen s ixxamen-nsen. Lewsex anda ma teddiḍ mmzerwaεen, zun akken ḥedd ur d-yecqi deg wannecten. Meεna ahdum yugaren wiyaḍ d abrid yettawin ɣer uɣerbaz alemmas n watmaten Ziyan, imi ar tura mazal-it kkan d la piste ur yettwaxdem ara, ur yedhi yid-s ḥedd. I tent-yettaɣen d arrac yeqqaren din akked yiselmaden-nsen, acku mi ara d-yewwet ugeffur, aεeddi ɣer lakul yettuɣal d ssiεqa ! Nesla abrid-agi bɣan ad t-semmin “’19 meɣres”, ziɣ d imi i as-qqaren : a wi run a wi ḍsan kifkif ! Di Ssuq Lḥed, anda ara dhun yimdanen d asafer ! Bexlaf leqhawi, d wurar n dduminu, kra wer yelli. Sin-nni les cybers-café zgan ččuren s yilemẓiyen yettnadin ad “ččaččin” d trumiyin amer ad d-afen tin ara ten-yesrewelen akkin s agemmaḍ. Telha targit ! Ssuq n Lḥed ihi d tamdint neɣ d tadart ? D timseεraqt ur nesεi tifrat, … ḥala ma beddlen leryaḥ. Yella win yeẓran ?
Ait Slimane Hamid