– A Ccix Muḥend! Mi ara selleɣ akka i wawalen-a iẓidanen, xir ma ččiγ swiɣ acku ssilqiqen-d ul-iw! Degmi iḥemmel-ikem yal ass ugar n win yezrin. Yerna s wacu iyi-tenɣiḍ,; s laḥdaqa-nni urğin rwiɣ,; s ssut-nni-inem yessefsayen ula d uzzal! Ma terniḍ tcennuḍ-d ɣer tayet-iw, dɣa dayen, kra ur yi-d-yeqqim!
– Ayu a Sifaks, ansi k-id-kkan akka wawalen-a iẓidanen?
– Seg tleqqaɛt n wul-iw yesfan, seg telqay n tayri-w, acku diɣen ttḥulfuɣ i kra n wayen i d aɣ-yesdukklen ama deg tmuɣli-nneɣ ɣer tudert, neɣ deg tmuɣli-nneɣ ɣer wayen-nniḍen. Acḥal d abrid yettaf-iyi-d lḥal txemmimeɣ ɣer wayen tessarameḍ,; tettxemmimeḍ ɣef yiman n tɣawsa deg yiman n wakud yid-i. Hata tura deg wacu iyi-d-tufiḍ bateɣ! Mlalen wulawen ! Kemmini akin i udrar, nekkini beɛdeɣ fell-am, maca ulawen-nneɣ dduklen ur yezmir wakud wala amecwar ad ten-yebḍu; ugar n waya, rennun-as lğehd d wafud i tayri-nneɣ!
– Akka d tidet, ayen d-teqqared amzun deg yimi-w ay d-ffɣen wawalen-a!
– Twalaḍ tura d acu i d am-id-qqareɣ? Qqareɣ-am ḥemmleɣ-kem s wul-iw, d tayri taẓidant, tabaḥant, tazedgant ur tt-yekcim kra n ukerfa n tkerkas. D iseɣ akk!
– Ah! Iseɣ! Anwa ara k-yafen d axeclaw deg tala ad k-id-yagem, deg uxxam ad teqqled d bnadem! Akka ay cennunt sut zik….
– Twalaḍ tura a Katya ? Ur zmireɣ ad ṣebreɣ fell-am neɣ ad ɛemdeɣ kra n txessart ara kem-yeblun mebla ma tḥuza-yi d amezwaru. Mi d-tbedreḍ axeclaw, ɣas ad tuɣaleḍ d winna ara ikecmen tiṭ-iw, werğin ad tt-ḥukkeγ! Yak ḥemmleɣ-kem, yerna ad kem-ḥemmleɣ,; ayen yebɣun yeḍru. Ur zemmreɣ,; ur beqquɣ,; ur ttnadiɣ ad kem-ğğeɣ…
– Ula d nekk ay afrux-iw!
– Teẓriḍ,; ulac ddqiqa i teffɣeḍ seg wallaɣ-iw…
– Ula d nekk, cwi kan yella tilifun! Mi ara yeččenčen neɣ mi ara afeɣ izen-inek, d tin ay d ddunit! Ttayseɣ ad t-ɣreɣ. Mi t-ɣriɣ,; ad as-ttεawadeɣ kan. Deg yiḍ uqbel ad gneɣ,; ad t-ɣreɣ i tikelt taneggarut akken deg yiḍ-nni ad k-arguɣ!
– Waqila tebɣiḍ ad yi-teshebleḍ!
– Nekk hebleɣ yakan fell-ak dayen!
Tettkemmil
Djamal Arezki