Taqliɛt d yiwen seg yizniqen i d-yezzin i temdint n Bgayet deg yiseggasen-a ineggura. Azgen ameqqran seg wid izedɣen din, bnan bla lekwaɣeḍ. Dayen i d-yeslulen aṭas n wuguren deg tudert n yal ass n yimezdaɣ yewwḍen ɣer 5000.
Abrid ameqqran yettawin ɣer Teqliɛt ihudd, yeččur d ixmujen, ur yesɛi ara aṭruṭwar; lḥasun deg tegrest d alluḍ,; deg unebdu d aɣebbar. Aman, d ayen iɣef kkaten yimezdaɣ akken ad crecren cwiṭ akka deg yixxamen-nsen. Murad, yiwen n umezdaɣ n Teqliɛt, yenna-d : “amer ssrabes n waman xeddmen akken ilaq, azgen seg yimezdaɣ ur iseɛɛu ara aman imi s tukerḍa i ten-ssawḍen s ixxamen-nsen. Ulac taɣanimt n waman ur tteflin ara akken ur ttxellisen ara kan.” Ziguwat ɣer ubrid i suffuɣen; lfuḥa-nsen tettaweḍ s agemmaḍ n uzniq, rnu i tizit i d-snulfuyen bla aṭṭanen. Lgaz n temdint ur yewwiḍ ara, ma d trisiti n yiberdan, wiss melmi ?
Tidukla n lḥuma-ya, tekkat deg acḥal n yiseggasen ad tekkes, ɣas ulamma kra kan akka, n leɛtab ɣef yimezdaɣ. D tin i yessawalen ad reqqɛen kra seg yiɣeblan n yal i ttidiren yimezdaɣ n uzniq-a.
D. I