Aɣerbaz alemmas n taddart n Yibehlal di tɣiwant n Uɣbalu (Taqerbust), yessaweḍ tikelt-a ad d-yesseɣres amḍiq amenzu di Tubiret s yigemmaḍ i d-yewwi deg ukayaḍ n B.E.M. 92,93 di lmeyya iɣer yessaweḍ uɣerbaz-agi. D acu kan, s kra n win i t-yesnen ahat ur iwehhem ara, imi tignatin ideg yettidir teɣzi n useggas d ayen yessefraḥen. Ama si tama n yiselmaden, inelmaden, tamehla akked yimawlan sduklen iɣallen-nsen iwakken ad mɛawanen taɛkemt. Ladɣa imawlan, ur ɣfilen ara deg uwelleh n dderya-nsen, d ayen i yessasehlen tamsalt i yiselmaden ad xedmen nnig tezmert-nsen. Imi, leɛtab yeffeɣ ɣer tafat, aɣerbaz-agi icebbeḥ tamnaḍt n usamer n Tubiret s yigemmaḍ-agi ara yilin d amedya i wiyaḍ ahat ad sɛun tismin ad ɛanden Ibehlal. Si tama-s, anemhal n uɣerbaz-agi, Omar Dellys, ihegga-d yiwet n tmeɣra ilmend n yigemmaḍ-agi iwakken ad yesnemmer iselmaden d yinelmaden ɣef wayen i d-wwin, am akken ara d-yesnubeg imawlan n warrac i d-yellan di lmendad. A wi yufan lukan iɣerbazen-nneɣ ad ddun tikli am ta, iwakken ad neqḍeɛ wid i aɣ-yeǧǧan !
M. Smail