Ulamma deg tmendawt n tmurt n Lezzayer yedda-d umagrad i d-yeqqaren tella tlelli n tesreṭ, meḥsub yesɛa azref yal aɣerman ad yeḍfer ddin i as-yehwan, wanag mačči d ayen i d-ibanen deg unnar. Aya imi, ma nemmeslay-d ɣef yimasiḥen n Tmurt n Yiqbayliyen, ayendin d uguren d lḥers i sɛeddayen ama sɣur yimḍebbren, neɣ ula sɣur kra n trebbuyaɛ n yimdanen. Ussan-a dɣa, di temnaḍt n Buǧima, yefka Mass lwali n Tizi Uzzu asuneḍ i umdal n tmesgida i yellan din, d amḍiq n talwit d tuẓin ɣer Yellu i ddeqs n yimasiḥen.
Akken i d-tewwi teɣbalut-nneɣ, yeṭṭef umasay n tmesgida n Buǧima Mass Mesɛud Taklit, ass n, 03 ɣuct yezrin, yiwet n tnecda sɣur ssrabes n yiǧadarmiyen n Makuda, akken ad as-d-mmeslayen ɣef lebɣi n lwali i ubelleɛ n tmesgida-a. I usmekti, lwali-a n Tizi Uzzu yella ɣef uqerruy n Tɣerdayt kra n yiseggasen tura ɣer deffir. Ma d sebba n umdal-a, tcudd ɣer ttesriḥ i ur tesɛi tmesgida, akken i d-iban lḥal.
«Ad aken-d-nesneɣmes d akken aram i d-iteddun, 6 ɣuct 2019, ad nekker i umdal n tmesgida-nwen s uxemmel. Ad awen-d-nefk akud i uheggi d usefreɣ n yidigan», d izen i ceggɛen yiǧadarmiyen ɣef wawal n teɣbalut-nneɣ. Seld taluft-a, ddeqs n yimeɣnasen i d-ibeggnen ibeddi-nsen ɣer yidis n yimasiḥen n tama-a n Buǧima. Wwten-d deg tigawt-a i walan d tamḥeqranit, d attɛeddi ɣef tlelli n ddin. «Mačči akk d azref ad tettwamdel tmesgida acku ur frint kra n tlufa n ujerred. Lemmer d abenyan-nniḍen, ur kenniɣ ad gen lḥers ɣef wat-is, akken gan d wat tmesgida», i d-yenna yiwen n yilemẓi.
M. K.