Ussan-agi ineggura yuzzel wawal di Tubiret ɣef ubeddel n lwali Ali Bouguerra ɣer umkan-nniḍen. Aya, d aɣmis n El Khabar i t-id-yessawḍen. Dɣa seg wass-nni, ama deg leqhawi, deg yifurguten, deg yiberdan, imdanen steqsayen acimi ara d-yeḍru rray-agi ?
S kra n wayen akk i nesla, ulac win i iwufqen abeddel n yimḍebber-agi, imi ɣef leḥsab n wayen i d-qqaren, amdan-agi segmi i d-yusa ibeddel-as udem i Tubiret, yerna yerra-d asirem i yimezdaɣ-is iwumi yeldi tawwurt yal mi ara ruḥen ad ssutren kra.
Iwakken lɣiḍ-agi ur yettɣimi ara kan deg umeslay, kra n yimezdaɣ n At Yaɛla, tama n usamer n Tubiret atan heyyan-d kra n tebratin ara yaznen i yimḍebbren teɛna temsalt iwakken ad ǧǧen Ali Bouguerra deg umḍiq-is, imi isenfaren i d-yebda mazal ur fukken ara, yerna almi i d-yusa i d-tban Tubiret d tamdint.
Γef wakken i nesla, aṭas n yemdanen-nniḍen i yettheyyin akka tibratin anda ara ddun di rray n yimezwura-agi, iwakken lwali-agi ad yeqqim di Tubiret.
D tikelt tamezwarut anda ara nẓer imdanen ssuturen imḍebbren-nsen ad qqimen deg yimukan-nsen ! Ahat ad yili d amedya i yimḍebbren wiyaḍ,; ad aɣen abrid n lwali-agi, abrid n lxedma, n ssfa d tidet.
M. Smail