Dayen, ffɣen yiɛsekriwen yegganen deg uɣerbaz akked tzeqqa n tɣiwant n Tawrit-Yiɣil beɛd mi ten-terra d lkazirnat seg useggas 1998. Aya, yella-d imi imezdaɣ n tɣiwant suturen seg wacḥal-aya ad asen-d-rren aɣerbaz akken arraw-nsen ur tt-kkaten ara ɣer Udekar, azal n 4 km, i wass aken ad ɣren, yerna wid i yeqqaren deg uɣerbaz amenzu.
Seg yilindi, ur ḥbisen yimezdaɣ n tɣiwant deg umennuɣ-nsen akken ad d-rren aɣerbaz d tzeqqa n tɣiwant, rnu-yas daɣen ad kksen kra seg yiɣeblan-nsen i d-ttmagaren yal ass deg tudert-nsen : am tazeqqa i lbusṭa, tazeqqa i usejji, abrid i ilaq ad iɛiwed, atg.
Lexber yuɣ akk tudrin n tɣiwant, yewweḍ akk ɣer yimezdaɣ imi ur umin ad yaweḍ wass, amennuɣ ad yeffeɣ ɣer tafat. Meɛna, « amennuɣ mazal yettkemmil imi ur mazal ara aṭas i tuɣalin ɣer uɣerbaz, ma d liḥala n tneɣriyin d tin ilaq aɛiwed s wadda », i d-yenna yiwen seg wufrinen. Dɣa, ɣef waya, mlalen yiɛeggalen n tudrin d uselway n dayra n Udekkar akken ad d-afen tifrat i wugur-a
D. I.