D. I.
Azal n 11% seg yizzayriyen ay d-teqqar lḥukuma-nneɣ ur xeddmen ara, ɣas ma aṭas n tuddsiwin i yeskadben leḥsab-a. D ayen i yessawḍen amḍan n yicumuren ɣer 1.169.000, gar-asen 87% d wid ur nesɛi akka ass-a 35 yiseggasen. Aṭas wallalen i d-tga lḥukuma akken ad tessenɣes seg wid ur nxeddem ; meɛna imassanen deg tedyant-a ttwalin d timerna ay rennun. Deg leɛṭil ad d-taf lḥukuma tasertit ilaqen akken ad tessenɣes cwiṭ seg yicumuren deg tmurt, lḥukuma n Ahmed Ouyahia, yeddem rray ad yettak i yal win ur nxeddem 6000 yidinaren i wayyur. Mačči d tikci kan n yisurdiyen, deg-s aṭas tmentilin (ccuruṭ) i wid yebɣan ad awin isurḍiyen-a. Ajerred ad yebdu ussan-a, ma d lexlas ad yebdu deg tazwara n useggas 2010. Ara yeskelfen s tlufa yerzan akk asafsar-a d tanmehla DAS n yal tawilayt.