Limer ad d-yezzi umdan ɣef tudrin yellan deg tɣiwanin n Bechloul, mebla ccekk ad ifaq s unerni di lebni n yixxamen. Ulac taferka ideg ur nettwali ara asenfar n lebni, almi i qqaren kra d akken meqqint-d tnezduɣin am yiberčečča. S tidet, d asenfar i yessuzfen lḥif ɣef waṭas n twaculin i yeffɣen si ddiq. Lemɛawna-agi yellan s 50 n yimelunen n ssantim deg yiseggasen yezrin tennerna, tuɣal ɣer 70 n yimelyunen ara d-yeddem umdan ɣef tlata yeḥricen almend n wakken yessaweḍ di lebni. D ayen yeǧǧan ass-a azal n wid yessuturen lemɛawna-agi yufrar ɣef wayen i d-tessewjad ddewla. Ɣer wass-a, aṭas n yikaramen i yersen di tnezzayt n Bechloul ttrajun melmi ara d-tili temlilit gar yimḍebbren terza taluft iwakken ad fernen wid ara yesfaydin seg usenfar-a. D acu kan, ɣas imdanen ferḥen s wayen akka i ten-id-isaḥen, maca leɣla n yisufar n lebni ladɣa ssima, tesseɛweq tiddi n usenfar. Asafa-a, yewweḍ ɣer yiwen n yiswir iwumi ur izmir ara umdan ad yaweḍ. D tiɣri I d-gren waṭas n yimezdaɣ anda ssuturen ad d-yili useḥres ɣef wid yeznuzen ssiman.
M. Smail