Zoubga d yiwet n taddart i d-yezzgan di tγiwant n Yillilten deg udrar n ğerğer. Taddart-a, tesselḥuy lecγal-is i yiman-is ; nezmer ad d-nini teteddu am wakken teddunt tuddart n leqbayel zik-nni acu kan s ttawilat n tura. Kra n wayen tteḥwiğin yimezdaγ n taddart-a, d nutni ara t-id-iḍebbren ur ttrağun ara dduwla : bdu-tt deg waman, iberdan, asufeγ n yiḍuman ḥalama d laqanun s wayen i tetuddun wat taddart. Lesrar n wanect-a yekka-d, ahat, deg wamek teddunt temsal n taddart-a. Tasqamut i yesselḥuyen lescγal, tettwaxleq-d deg useggas n 1986. Yal tawacult tesεa sin n yiεeggalen-is s daxel. Iεeggalen-a ttwafernen-d gar wid i izemren i temsal n taddart ; ‘’wid n ttwab d lmeεqul’’, akken d-qqaren. Gar yisenfaren i xedmen nezmer ad d-nader : anekcum n waman i yal axxam di 1986, abelleḍ n yiberdan s yiẓra umsilen di 1992, lebni n uxxam n yilemẓiyen di 1998…atg.
Zyada γef wanect-a, llant snat n tdukliwin ; yiwet n yidles ‘’tiddukla tadelsant taγerma’’ tayeḍ n waddal ‘’tiddukla tanaddalt Igli.’’ Gar warrazen i yewwint tdukliwin-a, nezmer ad d-nader : arraz amewaru n ccḍeḥ d llebsa taqburt di Σennaba deg useggas 1999, akked talγuγa taγelnawt n « les jeux d’échecs » n yimeẓyanen. Taddart n Zoubga tewwi diγ s lekmal-is arraz amezwaru n tezdegt : « taddart tazeddgant n lwilaya n Tizi Uzzu »
Zoubga d amedya i wid yenwan ad d-rren lhiba n tmurt n leqbayel.
Lhocine Ourezki