Deg ussan-a n wagur n remḍan i iɛeddan, axxam n yidles Ṭawes Ɛemṛuc n temdint n Bgayet, iheyya-d yal umṛaḥ-ines tameɣṛa, ad ner lwelha dakken timeɣṛiwin-agi mebla idrimen, ayen yeǧǧan imezdaɣ rezzun d tirni iwakken ad ksen ɣef ulawen-nsen. Dɣa din, nemlal-d sin n yicennayen i yersen ɣef lexwateṛ n wid i d-yerzan, deg yiwet n tmeɣṛa gar tiyyaḍ, wigi d icennayen Baylache akked Louiza. Taneggarut-a i yellan, ɣef akken i aɣ-d-tenna, di tallit-a d tamɣaṛt n temɣaṛin n ccna n teqbaylit mbeɛd Cherifa. Nna Louiza, ccna-ines yettwassen di tmurt, yerna yeffel akkin i lebḥeṛ acku tizlitt-is « tiqwict-iw dewweḥ-dewweḥ » i tecna zik-nni tettwasuqqel ɣer tlata n tutlayin, tettwacna deg tmura am Marikan, Ccinwa d Fṛansa; atan wawal i aɣ-d-tefka ɣef ddema .
Aɣmis n yimaziɣen: Anida i d-tegra tnaẓuṛt Louiza?
Louiza: Gar Lazzayer d Fṛansa, lliɣ aḍar da wayeḍ dihin, maca ussan-a ineggura reṣṣaɣ iman-iw di tmurt, akken i s-nniɣ deg yiwet n tezlit « tamurt n Leqbayel tif « la suisse »».
Aɣmis n yimaziɣen: Mesliy-aɣ-d ɣef tesfift-im taneggarut i d-yefɣen deg usaggas-a n 2011.
Louiza: D tidett, mbeɛd sin n yiseggasen n lxedma, sawḍeɣ ad d-sufɣeɣ ɣer teẓrigin Allagh Music tasfift i yeddan akken iwata di ssuq, deg-s tmanya n tezlatin, cniɣ deg-s ɣef: yilmeẓyen d taluft n lḥeṛṛaga, tameṭṭut tezzayrit, tayri, timetti d lemḥan i sɛeddaɣ.
Deg wagur-agi n remḍan, d acu i d ahil n ccna i tesɛa Louiza?
Sɛiɣ timeɣṛiwin dagi di temdint n Bgayet, deg Micli, deg temnaḍt n Ṣṣumam akked deg Tici yal iḍ.
D acu ara d-tiniḍ ɣef tmeɣṛa n yiḍ-agi?
Ad d-iniɣ tanemmirt i wid akk i d-yusan ɣer tmeɣṛa-agi, cukteɣ nesɛedda-tt akken i iwata.
D acu ara d-tini Nna Louiza deg wawal n taggara?
Aṭas i d-fkiɣ i tdukliwin, asmi meẓẓiyeɣ yalla ufud si yal tama, s kra n win i yi-d-iɛerḍen sfṛeḥeɣ-t, ma d tura ladɣa imi d taǧǧalt ay lliɣ, ilaq wid teɛna temsalt ad aɣ-d-muqlen, neččeḥ. Amedya, deg Tizi Wezzu d Tubiret, seg useggas n 2004 ur yi-d-ɛriḍen ɣer tmeɣṛiwin tunṣbin, annect-a daɣen ɣef tilibizyu, d acu kan llan wid i yi-ḥemlen, i yi-d-yettaran asirem.
F.L
Baylache d acennay wis sin i d-nemlal, d ilemẓi, d amaynut, yesɛa yakan snat n tesfifin deg ssuq ; tis tlata tetteddu-d. I usmekti itri-agi i d-yeflalin d mmi-s n ucennay Idir n terbaɛt Akfadou i yettwasnen. Mi t-neseqsa atan d acu i aɣ-d-yerra.
Aɣmis n yimaziɣen: D anwa i d Baylache?
Baylache: D acennay ilemẓi n ccna n teqbaylit, bdiɣ tturareɣ s wallalen n lmuziga seg temẓi, deg uxxam, syin akkin di tesnawit d tseddawit akked daɣen d tdukliwin tidelsanin.
Amek i tzegreḍ seg urar s wallalen n lmuziga ɣer ccna?
Di tidett, zik ccniɣ deg trebbaɛ n warrac imecṭaḥ (chorales), mi mdeɣ ciṭuḥ urareɣ lmuziga i waṭas n yicennayen, maca deg useggas n 2007 ccniɣ d baba (Idir Akfadou) tizlitt « d lawan ad ṛuḥeɣ » ilmend n yinelmaden. Anect-a dayen i yi-d-ifkan afud iwakken ad ccnuɣ, ladɣa 06 n waguren mbeɛd, tizrigin Allagh Music zwaren-iyi-d awal iwakken ad yi-d-sufɣen tasfift, dɣa skelseɣ i tikelt tamezwarut, deg ustudyu Yugurten deg Yiɛeẓẓugen, tasfift « abrid ideg ur d-ttuɣaleɣ » deg useggas n 2008.
D acu-t uɣanib (style) n ccna n Baylache?
Baylache: Bdiɣ s lfulkluṛ d cceɛbi atrar, ma d tura ahat zemreɣ ad d-iniɣ snulfaɣ-d aɣanib-iw, acku skecmeɣ-d allalen imaynuten.
Mesliy-aɣ-d ɣef tesfift-ik tis snat i d-yefɣen deg useggas-a n 2011.
Tesfift-agi semmaɣ-as « ḥesbeɣ-tt inu », deg-s 07 n tezlatin, ccniɣ deg-s aṭas n yiɣunab (styles): atrar, cceɛbi d lfulkluṛ, telḥa nezzeh di ssuq.
D acu i d ahil n ccna yesɛa Baylache deg remḍan-agi?
Sɛiɣ timeɣṛiwin akked tenmahla n yidles n Bgayet, tiyyaḍ, deg temdint n Tici, deg Tizi Wezzu d temnaḍt n Ṣṣumam.
D acu ara d-tiniḍ ɣef tmeɣṛa n yiḍ-agi?
Dayen i isefṛaḥen, ack-itt, tanemmirt i wid i d-yusan, daɣen i terbaɛt n lmuziga Tilaniya.
Awal-ik n taggara?
Tanemmirt i uɣmis n yimaziɣen iwumi sarameɣ tabɣest i igerrzen. Sarameɣ icennayen n ccna-agi-nneɣ ad ttemḥuddun gar-asen, daɣen sarameɣ ad sɛuɣ asenfaṛ n ccna deg tmura n lbeṛṛani ayɣeṛ ala, di taggara ad awen-ṛegmeɣ amaynut i useggas n 2012.
Farid Lahouari