Yennerna-d i tsekla taqbaylit umaynut s wazal-is, yerna tikkelt-a yemgarad ɣef wayen i nuɣ tannumi nettwali-t. Ayagi d ayen iwumi teḥwaǧ teqbaylit nezzeh. Amaynut-a dɣa, d adlis n wawalen yemcubbken, neɣ n uẓeṭṭa n wawalen. Rnu ɣer wazal i yesεa wungal, ammud n tmedyezt neɣ n tullisin, deg usegmu n tsekla, adlis-a n uẓeṭṭa n wawalen, d agerruj i win yebɣan ad yessemɣer tamussni-s deg umawal n teqbaylit. Mhenni Xalifi, i d-yessuffɣen yakan ddeqs n yidlisen s teqbaylit, gar-asen Ammud n yisefra » Nnehda n Uḥulfu », win n tullisin « Nna Geltum », akked sin n wungalen « Asdawan » d » Imehbal », aneggaru-a s yis-s i d-yufrar deg warraz n Asya Ǧebbar n wungal ifazzen.
Yewwi-d ass-a amaynut-nniḍen, d adlis-a n wurar s wawalen, i d-yeffɣen di teẓrigin n Ccix Muḥend Ulḥusin. Ma yella nemmeslay-d ɣef Mhenni Xalifi, ad t-naf iqeddec deg unnar n teqbaylit, yefka-as azal meqqṛen. Dɣa, Mhenni d amaru, d aneɣmas, d ameɣnas daɣen n teqbaylit, yezga d aseḥbibber fell-as. Daymi i iqeddec ula deg yiṣenfaṛen n usideg n kra n yidigan d yifecka n tsenselkimt. Deg wawal i d-newwi yid-s, negza belli leqdic-a, d axeddim n yiseggasen, ayagi, imi uraren-a llan ffɣen-d yakan deg yisebtar n Uɣmis n Yimaziɣen, gar useggas n 2014, d win 2015. Am wakken i yettwaru deg tduli n udlis-a, uraren-a i d-yeffɣen d aḥric seg wayen i yura.
Ma yella ɣef uṣaḍuf n wurar-a, ama s wudem aglawan, neɣ aratak, yewwi-d ɣef win yetturaren ad d-yaf anamek yettqaṛaben i yal awal deg texxamin n uẓeṭṭa. Dɣa, simmal ara ad d-tettili tririt d tuɣdimt, simmal ara d-ttbinent tifrat deg tejgut neɣ adur-nniḍen. Di taggara, Mhenni yerra-as tajmilt i uletma-s Kaysa, fell-as talwit, dɣa ibudd-as adlis-a i yiziɣer-is, nettat i t-iεewnen aṭas deg leqdic-a.
K. K.
