Ad yeldi uɣerbaz tiwwura-s i tuɣalin n yinelmaden ass n larebɛa, 4 deg cutember 2019, i lmend n useggas aɣurbiz 2019/2020.
D inelmaden n uɣerbaz amenzu d wid n ulemmas akked wid n tesnawit ara yuɣalen deg wazemz-a, i d-isenṣeb uneɣlaf n usegmi. Ma d iselmaden, ad yaɣ lḥal uɣalen, imi nutni ad kecmen uqbel yinelmaden, ass n lḥedd, 1 deg cutember 2019. Yetturaǧu, ad tebdu temsirt tamezwarut, s wudem unṣib, ass-nni n tuɣalin n yinelmaden, meḥsub ass n larebɛa, 4 deg cutember.
Ma d afraq akked usenzi n yidlisen, ilaq ad ifak uqbel deg wussan imenza n waggur n tuber i d-iteddun. Ma d tuɣalin n yixeddamen akked yinemhalen ad tili ass n lḥed, 25 ɣuct 2019. Ma deg wayen yerzan leǧrida n yimuras n useggas-agi aɣurbiz amaynut, yefka-d uɣlif n usegmi aɣelnaw azemz n talliyin-agi. Imuras n ḥertadem (lexrif), ad d-ilin aseggas-a seg wass n ttlata 29 tuber ɣer wass n lḥed 3 unbir 2019, wid n tegrest (ccetwa), ad d-ilin tikkelt-a, seg wass n lexmis 19 duǧember 2019 alamma d ass n lḥed 5 yennayer 2020.
Imuras n tefsut, yetturaǧu ad d-ilin seg wass n lexmis 19 meɣres alamma d ass n lḥed 5 yebrir 2020, wid n unebdu ad d-ilin tazwara n yulyu. Am wakken i tetturaǧu tullya d uɛiwed n usexdem (mise en service) n 656 n yisɣuren seg tuɣalin-agi n 4 cutember i d-iteddun. 426 d iɣerbazen imenza, 137 d iɣerbazen ilemmasen akked 93 n tesnawiyin, yettwaferqen ɣef 48 n lwilaya n tmurt n Lezzayer.
A. A.