Гef tfaska n tmedyezt n Udrar N Fad

Partager

Taggara n ddurt-a yezrin – amhad, sem, ed sed – tella tɣiwant n Ayt Smaɛel d rreḥba n yimeɣnasen n yidles amaziɣ i d-yerzan seg waṭas n tamiwin n Tmurt n Yizwawen akked temnaḍin timaziɣin nniḍen. Kraḍ n wussan-n ihi llan d wid yeččuren d armuden idelsanen; seg umsiẓwer n tmedyezt ɣer yisaragen yemgarraden, ɣer temzikknin yeṭṭuqten, ɣer tnezzuyin n ubuddu n ddeqs n yimyura, war ma nettu asenɛet n yirupurtajen akked ttiɛad n ccna i as-d-yellan i tnaẓurt tinebgit n yiseɣ massa Malika Dumran. Deg teldayt tunsibt ihi yezzwar deg wawal uselway ilemẓi n Tidukkla Tadelsant Adrar n Fad mass Fares Bakkuc anida i yesnubget s yisem n yiɛeggalen n Tdukkla s wid akk i d-yerzan ɣer Udrar n Fad, rnu yesmekta-d ayen tettag akka tdukka s wudem n tejmilt i Dda Lmulud At Mɛemmer d asemmed deg umennuɣ i d-tewwi seg wacḥal-aya. Anmazul n uselway n tɣiwant n Ayt Smaɛel mass Sadeq n Ayt Urbaɛ yella-yas-d daɣen wawal, imi dɣa netta yemmeslay tazwara s yisem n Usqamu Aɣerfan n Ayt Smaɛel send ad yesnemmer imedyazen mi ɛewwlen s timmeɣnest-nsen ad rzunɣer Ayt Smaɛel ɣas xesren yiberdan, syin ɣer-s iceyyeɛ tiɣri i yimedyazen ad kemmlen aqeddic ugar deg usnerni n tutlayt-nneɣ. Ma yella Malika Dumran ur d-telḥiq ara ass n lexmis zik, almi i d-tenna awal-is ass n lǧemɛa, d win swayes tesnemmer ladɣa Tidukkla Tadelsant Adrar n Fad ɣef wayen tettag deg wannar n yidles. Gar wayen i d-yellan d armuden, llant-d ddeqs n temzikknin i walmend, am tin n tnaẓurt n uplastik Suzzane Gouhot i yeslemden ddeqs n tlufa i warrac. Seg tama n yisaragen, ad d-naf dakken mass Ɛli Syad, i d-yewwin ɣef wawal n tlawin, akked massa Buxellu Malika Faṭima i d-yewwin ɣef wudmawen n twetmin deg wayen yura Mulud At Mɛemmer, rnu-yas Wataḥ Linda i d-yewwin ɣef wurar n lxalat ama n zik ed tura, akked yisefra i d-ttawint. Wi merra d wid i yesmursen deg wayen i d-gan, ma neẓra dakken azayez yeḍfer akken ilaq isragen n yisaragen-a i yeɣɣentren d abaɣur. Tameɣra n ccna n Malika Dumran i yellan tettwarǧa aṭas, tella-d taggara deg wass wis sin mettwal 21sr30 sdat n twinas n medden i d-yerzan seg waṭas n tamiwin akken ad walin tanaẓurt tettawi-d deg Udrar n Fad tizlatin-is icebḥen. Tameɣra tdum isragen lwaḥi daɣen d kra n yicennayen ilemẓiyen n taddart n Ayt Smaɛel am mass Wali ɛebdelɣani. Ma yella deg wass n sed, win n useqqef, yella-d ladɣa usenɛet n yirupurtajen n yimedyazen i d-yufraren deg teẓrigt n 2014. Ma d igmaḍ (résultats) unsiben n temzizzelt, deg wakud-a gedged ideg nettaru amagrad, werɛad i d-banen yismawen n yimedyazen i d-yufraren. Ad d-nuɣal s wugar n yisallen ddurt i d-iteddun. 

Mhenni Xalifi

Partager