Accueil Tamazight Aheggi n teẓrigt tis sḍiset

Tasɣunt Aselmad

Aheggi n teẓrigt tis sḍiset

25

Mbeɛd semmuset n teẓrigin n tesɣunt Aselmad i yellan akka tura deg unnar, berrḥen-d yimsuddsen n tesɣunt-a s uheggi i usuffeɣ n teẓrigt tis sḍiset. D akka i t-id-nnan sin n yimɛawnen n leqdic-a M. Hallit akked L. Belaidi, ama deg usebter-nsen n facebook neɣ deg usebter n tesɣunt neɣ deg yigrawen i d-yessemliliyen iselmaden n tmaziɣt. Fkan-d kra n yilugan i swayes ara telḥu tesɣunt n tikkelt-a, rnan-d azemz aneggaru i uceggeɛ n yiḍrisen. Ur nettaf ara aṭas n umgarad gar tesɣunin yezrin d tagi yetturaǧun ad d-tlal d tamaynut, imi talɣa d usentel n uḍris mačči d ufrin: Yermer ad yili d amecṭuḥ, d alemmas neɣ d ameqqran ɣef usentel i yehwan i umeskar-is; zemren ad ilin kra n yisefra, timsirin, ula d uraren d tefɣulin (BD) zemren ad kkin yis-sent wid i sent-yessnen. Acu kan, yessefk merra afaris ara yettwaceyyɛen, ad icudd ɣer uɣerbaz, acku d wagi i d iswi amenzu n tesɣunt Aselmad. Yerna d wa i d isem-is i d awal-is. Ad tettuneḥsab d aɣbalu ɣas d amectuḥ ama i uselmad, ama i unelmad, deg-s ad d-agmen ayen i ttnadin. I wid yebɣan ihi tira d uselmed n tmaziɣt ad nnernin, i wid ijebbden imru, yegra-d kan ad arun iḍrisen-nsen u ad ten-aznen send azemz n 20 deg yulyu 2019, ama s ubrid n facebook ɣer web. facebook.com/mehenna.halit neɣ s ubrid n E-mail ɣer misumazigh@hotmail.fr. Sya ar yimir, yegra-d kan ad awen-d-nini afud igerrzen.

Khaled Achoui.