Seld aṭas n wakud d araǧu sɣur yilemẓiyen i yessaramen ad xedmen deg uḥric n tezmert, ladɣa at usamar n Bgayet, a-t-an ad yili ayyur i d-iteddun yiwen n umsizwer i yerzan snat n taggayin, deg Usudu aɣelnaw n usileɣ afellay aparamidikal n Uweqqas. Taggayin i ikecmen deg umsizwer-a, d tid icudden ɣer umɛiwen deg ukersi n umsujji n tuɣmas d tezmert tazayezt, s wazal n 25 n yimukan, akked umɛiwen urebbi n tezmert tazayezt, s lqidar n 20 n yimeḍqan-nniḍen.
Ɣef wayen yerzan imeḍqan ipidagujiyen i d-yettunefken taggara-a i uɣerbaz-a sɣur uɣlif n tezmert, ɛeddan 40, akken i d-tewwi teɣbalut-nneɣ. Ad d-nesmekti d akken akud aneggaru n usras n yikaramen sɣur yisdawanen d yilemẓiyen, yettwaɛeyyen-d i wass n 11 meɣres, yettusemma ass-a n arim. Ma yella d azemz n umsizwer, nnan-d wid iqerben i uɣerbaz-a, ad d-yeḍru ass n 25 yebrir i d-iteddun.
Syinna, ad d-binen anwi imyizwar ara yettwafernen seld akayad-a, akken ad kecmen deg umaḍal-a n tesnujjya. Ayen i d-yewwin asileɣ-a, neɣ gar yiswan n uberreḥ yis-s, d tiririt i tiɣriwin n tsuda n tezmert yemgaraden, i yesran i ugar n yifassen, maca daɣen d asemɣer n lqidar n yifiremliyen deg uɛric n tezmert tazayezt n yakk aɣir n Bgayet. Mi ara kfun yisdawanen asileɣ-nsen, wid merra i d-iḥellan igerdasen n teklalit, ad asen-d-siḥen yimeḍqan n uxeddim deg walbaɛḍ n sbiṭarat d tzeɣwa n udawi i inuḥen deg yakk akal n Bgayet. « Aṭas-aya nekk ttganiɣ amsizwer-a deg n usudu Uweqqas. Ad ɛerḍeɣ ṭra s wayen iwumi zemreɣ wissen ad d-awiɣ agerdas n tfiremlit », i d-tenna yiwet n tlemẓit.
M. K.