Ahat allus (recyclage) d tagrawla tamaynut n tallit-a, i d-yewwin ayendin d tifrat i umdan. Ama d aplastik, d uzzal, d akarṭun neɣ d tanga-nniḍen, s wallus yuɣal yella wamek ad as-d-nɛiwed i tɣawsa talallit, ad nsenqes seg uḍegger n uhicur deg ugama. Dɣa, iseggasen-a ineggura, yennulfa-d ula d agezdu uzzig di tesdawiyin i yerzan aḥric-a n wallus n tangiwin. Ayendin d isdawanen i ten-iḍefren armi, ma nemmeslay-d ɣef Bgayet di mraw n yiseggasen ineggura, ddeqs i d-yeffɣen s ugerdas i ten-yeǧǧan snulfan-d asenfar-nsen.
Leddin luzinat, ttaɣen-d aplastik yettwasqedcen, xeddmen-as allus akken ad yesɛu tudert-nniḍen. At luzinat-a, ttaɣen-d ikuja, tiqerɛatin d yikersiyen iqburen, ttarran-ten s tasirin n tmacinin d iɣed, neɣ d ayen iwumi qqaren « tanga tamezwarut ». D acu kan, ur yelli tura ssuq n uplastik akken yella iseggasen imezwura mi d-iban wallus d amaynut. Zik ḥaca wid yesɛan agerdas n tesdawit, ɣran ɣef umaḍal n uplastik, iwumi tettunefk tegnit ad kecmen di taɣult. Maca tura, menwala yesserwat deg unnar ma yesɛa idrimen, s uɛemmed n lḥukuma.
D ayen i yeǧǧan ilemẓiyen i d-yessuffɣen isenfaren yemgaraden, rfan seg ubeddel-a i ten-iḍurren nutni d tkebbunay-nsen. Uɣalen ur xeddmen ara, ur d-sekcamen ayen s wacu ara xellsen ula d akray n ugaraj anda kran. « Ilaq ad yili s teɣseb uɛiwed n tmuɣli ɣef ssuq-a n uplastik. Amek tɛemmed lḥukuma teldi tiwwura i wid ur nelli seg taɣult, armi d wid yesɛan igerdasen i yenṭerren. Aql-aɣ ur nxeddem ara. Nenṭer aṭas », i d-tenna yiwet n tlemẓit. Ilaq ad d-nesmekti d akken ddeqs i iqeddcen deg tebrek seg wid ur nesɛi agerdas, snuzuyen aplastik yeɣɣden s ssuma ara yenɣen tin n luzinat n yilemẓiyen. Tuget deg-sen, sɛan kan ttesriḥ n ujmaɛ n uplastik si tudrin, maca xeddmen ula d aɣɣad s tmacinin berra n usaḍuf.
M. K.