Aṭas n yisenfaren i mazal i ilaq ad ttwaxdamen sya ɣer sdat, yettwajerden deg wahil n usiɣwes (aménagement) n lwilaya n Tizi Uzzu.
D ayen sawyes i d-iberreḥ Mass Awcic Yucef aselway n Useqqamu aɣerfan n lwilaya n Tizi Uzzu. Gar-asen, ad d-nebder, asenfar n unafag ameẓẓyan aɣelnaw di lwilaya n Tizi Uzzu akked usagan (port) adamsan, i wakken ad tennefusi taɛkumt ɣef uḥric n tdamsa di lwilaya-a. Yettaɛraḍ diɣ Useqqamu-a, ad iṣeggem yir aseddu n sin yisaganen, yellan deg temdint n Tegzirt akked Uẓeffun, i tsedduy yiwet n tkebbanit n Bgayet, i d-yelhan s uḥric-agi. Llan diɣ isenfaren n temnaḍin timguranin (tiṣnayɛiyin), yecban tin n Souamaa di Mekla d tin n Tizi Gheniff, ara d-ixelqen lɣella tameqqrant, ama si tama n udrim ama si tama n uxlaq n yimukan n uxeddim.
Yella diɣ uḥric n usefti deg tmerrit n udrar, imi aṭas n yimukan i yellan deg temnaḍt-agi, cebḥen yerna zemren ad ɛiwnen tadamsa n ttawil n tmerrit. Tin yernan ɣur-s, d asenfar n lebni n usagan n ujmaɛ n sselɛa, ur d-nesqamay ara aṭas, maca d ayen ara d-yawin lfayda i texriṭ n lwilaya-agi. Tella diɣ, tikti n ukemmel n ubrid n tmacint, i iḥebsen di Wad Ɛissi, ad tkemmel ɣer Yiɛeẓẓugen, maca tura akka tezrawt kan i d-yellan i wannect-a. Ma deg wayen yerzan imuhal izuyaz, sumren-d yiɛeggalen n Useqqamu-a, asewseɛ n yiberdan imeqqranen d ureqqeɛ n yiberdan n lwilaya, i yeɛyan aṭas, ur nettuɛawed ara seg useggas n 2013. Ɣer tama n uɣiwel i usekcem n lgaz ɣer tɣiwanin-agi n At Cafeɛ, Zekri akked Uqerru, imi ur sɛant lgaz n temdint. Asenfar-a d ucrik gar Bgayet d Tizi Uzzu, imi ad ad- iruḥ si Bgayet, yerna ad iḥaz 5 n tɣiwanin deg-s ɣer tama n tɣiwanin-agi i d-nebder yakan.
Am wakken diɣ, i yella usenfar n usekcem n trisiti ɣer 20 000 n yixxamen ur nesɛi ara ttawil-a di lwilaya-agi, i yetturaǧun ad bdun lecɣal-is deg wussan i d-iteddun. Ɣer tama n waṭas n yisenfaren-nniḍen d lecɣal imezgiyen n useqqamu, gar uheggi n tugliwin, timeɣriwin, timsizzelt Ɛissat Rabaḥ n tezdeg. Ulamma, nenna-d annect-a ɣef yisenfaren-a, maca llan wid ur nettwaxdam ara s sseba n yiɣeblan. Aṭas n wuguren i d-yettmaggar Useqqamu aɣerfan n lwilaya-agi deg uxeddim-is ladɣa deg uḥric n usefti.
Llan yiɣeblan yeqqnen ɣer ddula, yecban taneḥyaft d usɛeṭṭel n yisenfaren, lexṣaṣ n tedrimt…atg. Ma si tama n yimezdaɣ, ugur ameqqran d tugin n yimezdaɣ asɛeddi neɣ axeddim n kra n usenfar deg wakal-nsen. Gar wuguren i ṣṣawḍen yiɛeggalen n useqqamu-a ad ten-frun deg yiseggasen iɛeddan, d tiririt n wazal n 321 n yiketaren n wakal yettwaferqen ɣef yimseftin ur nexdim ara isenfaren-nsen, ɣer tama n lexṣaṣ n wakal n tfellaḥt, imi lwilaya-agi aṭas n wakal n udrar i tesɛa. Yella diɣ wugur n waman, iwumi fkan azal d ameqqran, imi mi ara ifak ubaraǧ n Ssuq n Ttlata, ad yenqes uɣbel n waman n tissit. Mebla ma nettu diɣ ugur n yiḍumman, iwumi mazal ur as-d-ufin tifrat segmi qrib ad yaččer ugudu-nni ameqqran n Wad Falli.
Adaoun Abdelghani