Ismawen i yessisnen tamurt n Leqbayel deg umaḍal s umata, ad qqimen i lebda ddren s ugerruj adelsan i d-ǧǧan. Mačči d ayagi kan, At Ɛebbas, seg wid yuraren nnuba tameqqṛant deg lgerra n Lezzayer, dɣa sεan ddeqs n yimeɣṛaṣen. Mebla ma nettu, lhiba d wazal i sεan, ama deg uḥric n tfellaḥt, neɣ di leṣnaf n tuččit. Rnu ɣer waya, sεan amezruy ula deg uḥric n txeyyaḍt d uzeṭṭa. Anda ddan yettban wayla-nsen, imi yemgarad ɣef wiyaḍ, yerna yewqem yegrurez, amedya d tiwwura n « Ɛebla ». D ayagi i εerḍen yimezdaɣ n temnaḍṭ-a, gar-asen wid n Yiɣil Ɛli, ad d-sneεten i umaḍal ass n, 15 tubeṛ yezrin, deg tnedlist taɣiwant n Yiɣil Ɛli.
Ad d-nesmekti d akken ttiεad-a texdem-it tddukkla « Adrar » n usegmi n tfellaḥt n Yiɣil Ɛli, s ufus n tallelt n tenmehla n tfellaḥt d tɣiwant n Yiɣil Ɛli, ilmend n usfuggel n wass amaḍalan n tuččit. Iswi n wid yekkin di temlilit-a, d asissen n ugerruj n temnaḍt-nsen i wid i d-yerzan, d usiweḍ n wayen i xeddmen i tmuṛa-nniḍen. Ayen yeṣṣefṛahen ugar, d amḍan n wid i d-yerran i tiɣṛi n uḥraz n tuččit. Usan-d dɣa ddeqs ad ḥeḍṛen dinna, imi llan seg wid yettaken azal i tezmert-nsen, ẓṛan azal n wayen yellan d agaman, ḥemmlen ad t-ččen . Ula d ifellaḥen n temnaḍṭ-a i d-isersen sselεa-nsen i lbiε, umren s tamawt i gren medden i sselεa-a, d wazal i as-fkan.
Ahat ula d nutni seg tama-nsen, rran-d i yisteqsiyen-nsen s tumert tageεmirt. Akken i neẓṛa, Iɣil Ɛli d tamurt n uzemmuṛ, ihi deg temlilit-a, yella zzit di ttiεad. Rnu ɣer waya, yella daɣen uyefki d wudi n tɣeṭṭen, ifelfel azeggaɣ aqeṛḥan, i yettwaxdamen kan deg At Ɛebbas, seqqdacen-t i usizweɣ n lmakla. Ula d tuččit tuzzigt n temnaḍṭ-a dɣa, teṭṭef amkan-is deg ufsar-a n sselεa, mebla ma nettu lfarina n uxeṛṛub d wayen-nniḍen. Ma yella deg wayen yeεnan taxeyyaḍṭ, teḥḍeṛ di ttiεad-a tddukkla « Tafat” n tullas n Yiɣil Ɛli, i usissen n wayen i xeddment. Ama d ibeṛnaṣ d tqeccabiyin, ama d iẓeṭwan, iwumi qqaṛen » Iḥembel » neɣ d tiqendyaṛ-nsen. Ula d ssxab s wacu xeddmen izraren n tullas, tefser-it-id yiwet n temɣaṛt i d-yusan seg taddart n Tqeṛṛabt. Axeddim-a i qrib yettwattu, teḥya-t-id temɣaṛt-a, i yesεan lebɣi yudef akkin i tlisa. Ama d wid i d-ifesren sselεa-nsen, ama d wid i d-yusan, umren ayendin s temlilit-a i yefkan azal i ugerruj n temnaḍṭ-a, d wid i t-ixeddmen.
K. K.
