Theyya-d tɣiwant n Ayt Smaɛel, ass n 12 duǧember yezrin, snat n temliliyin i lmend n usmekti n tmenɣiwt n lmir aqbur n Ayt Smaɛel, mass Ǧebbar Sseɛdi, akked tikci n kra n warrazen i yinelmaden ifazzen, i d-yufraren s tlemmast yelhan deg ukayaḍ n bakalurya iɛeddan. Deg temlilit tamezwarut, yella-d usras n tmuqqint n yijeǧǧigen ɣef uẓekka n mass Ǧebbar Sseɛdi i yettwanɣan ass n 12 duǧember 1994 sɣur yifassen n yirebraben, mi as-qasmen deg Yiderginen mi d-yuɣal seg Bgayet anda yekki deg yiwen n umegraw n uxeddim. Yenna-d deg umḍiq i lmend n usmekti mass Sadeq Rebbaɛi, lmir amiran n Ayt Smaɛel, kra n wawalen n tejmilt ɣef urgaz-a i iqedcen seg wul-is ɣef tɣiwant-is.
Yuɣ lḥal, ḥeḍren deg usmekti-a yiɛeggalen n useqqamu aɣerfan aɣiwan d kra n yimdukkal n umerḥum Ǧebbar Sseɛdi. Ma yella d tigawt tis snat, d timlilit i d-ijemɛen imḍebbren n tɣiwant d yinelmaden iẓewren maḍi deg BAK yezrin, akken ad asen-ttunefken warrazen n usnemmer d usebɣes ɣef yigemmaḍ yelhan i d-ḥellan. Tikkelt-a ihi, mačči i yinelmaden merra i d-yuwin akayad n bakalurya i tefka tɣiwant arrazen, ɣef kra n tmental. Tefren-d kan widak yesɛan tilemmasin tigeɛmura. Gar yimawlan n yinelmaden ifazzen, isuffeɣ-d daɣen lmir n Ayt Smaɛel awal-is ɣef tfuggla-a imuggen d wazal n tiẓin ɣer sdat deg umecwar asdawan. Ɣas tsulles cwiṭ tallit s wayen i d-iḥettem Covid-19, tban-d tumert deg wudmawen n warrac d yimawlan deg tegnit-a i d-yettwaheyyan deg uxxam n tɣiwant n Ayt Smaɛel.
M. Azwaw