Iberreḥ-d ass-nni n lexmis deg usebtar-is unṣib n Facebook, uneɣlaf n Usegmi aɣelnaw, Abdelhakim Belabed belli atug n urbaḥ deg ukayad n taggara n ulmud alemmas, yettwassnen s yisem n BEM, yewweḍ ɣer 60,37%, deg wakal n tmurt. Yenna-d uneɣlaf Belabed, belli agemmuḍ-agi yewweḍ ɣer 79,16% deg 48 n lwilayat, mi ara d-nseddu atug n uɛeddi (tazmilt n rrbeḥ deg yikayaden rnu-as agemmuḍ n useggas aɣurbiz).
Deg wulɣu-agi, i d-yerra deg usebtar-is unṣib, iban-d belli d tullas i d-yewwin akayad-agi ugar n warrac, imi ineggura-a atug-nsen yewweḍ kan ɣer 49,37%, di lawan ideg win n tullas yelḥeq ɣer 50,63%. Iger-d diɣ tamawt ɣef tezmilt n 15/20, i yeṭṭuqten s waṭas deg ukayad-agi. Ma d igemmaḍ ineggura, yetturaǧu ad d-banen tameddit n wass-a ɣef 17h00.
Ula d aseggas-agi, yeḍḥa-d belli d lwilaya n Tizi Uzzu i d-yufraren i tikkelt tis 11, ta deffir ta, deg ukayad-agi n BEM. Imi seg useggas n 2008, d nettat i yettaṭṭafen taqacut n umyezwar deg yigemmaḍ n tlata n yikayaden n taggara n useggas, gar-asen akayad-agi n BEM.
Atug n rrbeḥ di lwilya-agi n Tizi Uzzu, yewweḍ ɣer 89,79%. Ad d-nesmekti kan, belli inelmaden-agi i yesɛan tazmilt n 10/20 neɣ ugar neɣ wid iɛeddan s usuffeɣ, ad ruḥen deg wussan-agi, ad jerden iman-nsen deg useggas amezwaru n tesnawit. Ma deg wayen yerzan igemmaḍ n ukayad n BAC, yetturaǧu ad d-bannen ass 18 yulyu 2019.
A. A.