Ussan-a yezrin i d-yeffeɣ uḍebsi amenzu n yilemẓi-asdawan Ferḥat Muḥli. D aḍebsi i deg i d-ddant sḍiset n tezlatin. Tal tizlit s tedyant-is. Yefka-as azwel « Ayen a ẓher-iw ». Yeffeɣ-d ɣer teẓrigin IDURAR MUSIQUE i yesselḥay unaẓur n teqbaylit Qasi Bussaɛd i yellan zik deg ugraw « IDURAR » akked Lawliya Bussaɛd. Ilul Ferḥat Muḥli deg wass n, 17 deg tuber 1993, deg Uweqqas, agezdu n Bgayet. D mmi-s n taddart n Tbuɛlamin (Tibuɛlamin, d taddart i yettafaṛen lɛerc n Ayt Buɛisi, di tɣiwant n Tizi n Berber) i d-yefkan ddeqs n yicennayen, gar-asen amenzu Ṭaher Σissi i yerẓan asalu s wudem unṣib i tezlit deg taddart-a, d win yessekles kraḍet n tesfifins, syin akin yuɣal d aselmad n tutlayt d yidles amaziɣ u yettkemmil duktura deg Fransa ɣef ccna amḥaddi deg umennuɣ ɣef tmagit. Yeḍfer-it-id Ǧuder Ḥammu, Ǧuder Ḥmama, Lwennas Gerruǧ, Ǧuder Murad, Sifaks Yal armi d ilemẓi Ferḥat Muḥli. Akka tura, ha-t-an ucennay-a yettkemmil almud-ines deg tesdawit n Σebdereḥman U Mira, yeḍfer aḥric n « PSYCHOLOGIE CLINIQUE ». Ha-tent-in tezlatin n album-agi : Ttxil-m aenf-iyi, Yelli-s n Leqbayel, Ayen a Zher-iw, Tin iruḥen, Ad am-d-iniɣ tidet akked Taneggarut gar tullas.
Akli Mouhoubi