I tikelt tamezwarut ideg ufrinen (les élus) d yinemhalen n ssrabes yemxalafen, mtafaqen deg rray, nnan-d akk yella leɛḍil deg leqdic. Ahil n 2005/2009, i d-yesɛan azal n 150 n yimelyaren, ar tura ur ččin ara ula 2/3 deg-s. D ayen i yeǧǧan imawlan n usqamu ad seṭɛerfen s lixsas-nsen. Dɣa, aselway n usqamu, Mass Hamid Ferhat, yenna : “nxus deg uxeddim”. Akken i tt-iwala yiwen seg wufrinen yenna-k ala lḥebs n Oued Ghir i qrib ad fakken deg-s lebni, ma d wiyaḍ i yetteḥwaj amezdaɣ ulac ; lwali aqdim yeǧǧa-tt akken tella Bgayet.
Ufrinen walan s timmad-nsen iɛewwiqen yellan deg wayen lqaɛa n lebni, ttwakksen seg yiwen n wass seg wasmi i d-yusa lwali ajdid Mass Ali Bedrici. Aɣilif, akken d-nnan wufrinen, d win yeǧǧan lwilaya n Bgayet, teqqim d taneggarut deg wayen yeɛnan ttawilat i yuḥwaj umdan deg tudert-is n yal ass, am sbiṭarat, iɣerbazen, iberdan, atg. Ayen yerzan aḥric n tezmert, sutren deg Lwali ad asen-d-yefk isallen ɣer wanda yessaweḍ usenfar (projet) n sbiṭar n Bgayet i yuɣalen s wudem unsib sbiṭar asdawan CHU.
Deg timlilit-a n APW n Bgayet, ulac amennuɣ-nni yettilin yal tikelt gar yikabaren, teɛreq tɣennant-nni ; mačči inu diri-t imi kečč mačči yid-i ay telliḍ ɣas awal-ik yelha iwenneɛ ad tsenfeɛ deg-s lɛama. Aya, yella-d akken ay d-nnan wid yeṭṭafaren tidyanin yerzan ikabaren, s lwali n Bgayet Mass Ali Bedrici, i yessawḍen ad d-yexleq tagnit i leqdic mačči i tuzzma. Seg wasmi i d-ireṣṣa da deg Bgayet, ibeddel ula d azal n APW, yefka-yas udem ajdid, d asqamu ara yilin ɣer tama tedbelt mačči mgal-is. Am wufrinen, am yinemhalen n tedbelt, d win ara yilin i tikci n rray mačči i usnulfu n wuguren.
Dɣa, ula deg tmurt n leqbayel akk, rsen-d lwaliyat mačči am wid tuɣ tanumi tesɛa-ten : widak-nni akken ur nqeddec, ur neggan. Deg Tubiret, la k-qqaren tuɣal d acanṭyi chantier à cièl ouvert, kulec ihudd, kulec ttɛawaden-as, lebni yettali, asfiqqed yettili-d sɣur lwali. At Tubiret, semman-as i lawli-ya Ali Poclain. Deg Bgayet, ssbeḥ d timlilit d yimezdaɣ,; tameddit d acali deg tzenqatin d tɣiwanin, deg yiḍ d anejmuɛ d yinemhalen. Yettɛassa s wallen-is ayen yebdan d wayen ara yebdun, d wanda ssawḍen yimahilen. Deg Tizi, ahilen yebdan mačči d imi ara ten-id-yini, ɛawden yiberdan, rnunt-d tmezduɣin, lḥasun, tembawel Tizi ! I tlata-nsen, amzun fernen-ten-id seg wid yettazzalen ur ɛeggun, seg wid ixeddmen ur ttmeslayen. Awi-d kan ad tegmu tmurt n Leqbayel. Dɣa dayen i yessaram cceɛb arqaq n tmurt n leqbayel.
Djamal Ikhloufi