El-Adjiba
Aserreh n yiberdan i kra n tudrin
Taɣiwant n El-Adjiba tettheggi deg wussan i
d-iteddun ad tebdu kra n yisenfaren s wazal-nsen. Di taddart n Semmache, ad bdun lecɣal n useggem n yiwen n ubrid yesdukkulen gar uɣerbaz amenzu Abbout d taddart n At Ɛisi tɛiddeḍ-d ɣef tmeqbert n yimeɣras. Azal n umelyar d uzgen i d-yettwaheggan i usenfar-agi iwakken ad yezzuzef lḥif ɣef yimezdaɣ n taddart-agi i yerwan lmerta di ttawil n usiweḍ imi tuget n tkeryas ur ttazmarent ara ad refden imdanen.
Di tama nniḍen, di taddart n la Crête-Rouge, yiwen n usenfar i ttraǧun At Yiɣil Ɛli i d-yettwaheggan. Imḍebbren n tɣiwant-agi haggan-d tadrimt iwulmen i userreḥ n ubrid yettawin si tewrirt tazeggaɣt alarma d iɣil Ɛli. Γef waya, d tiririt i usuter n yimdanen i d-yellan tikelt-a, imi taggara-agi snat n tudrin-agi, Semmache d la Crête-Rouge, zgant suturent aserreḥ d useggem n yiberdan yuɣalen d iɣezrawen.
M. Smail