Accueil Tamazight D tasnawit n Friḥa i d-yufraren di tezrigt-agi tis 7

TIZI UZZU - Taggara n temsizzelt gar tesnawiyin

D tasnawit n Friḥa i d-yufraren di tezrigt-agi tis 7

30

D leqdic ussnan, i d-tettheggi yal aseggas Tenmehla n usegmi d usedwel n ugezdu n Tizi Uzzu. D tazrigt tis ṣat, i d-yellan ass-nni n larebɛa 12 yulyu 2019.

D tazeqqa tameqqrant n Uxxam n yidles Mulud Mɛemmeri n Tizi Uzzu, i d-yesdurin leqdic-agi meqqren, yebdan seg 16 yebrir 2019. Timsizzelt-agi, i d-iɛeddan ɣef ddeqs n yiḥricen, armi i d-tewweḍ ɣer uḥric aneggaru, tella-d temsizwert n taggara n temsizzelt “Gar tesnawiyin”, gar tesnawit n umeɣras Slimani Muḥemed n Friḥa mgal tasnawit n tmeɣrast Faḍma n Summer n Tizi Uzzu.

Yal tasnawit, gensen-tt tmanya n yisnawiyen, anda yal anelmad yettwafren-d i yiwet gar ṭamet-agi (8) n tangiwin: Tusnakt, amezruy, taɛrabt, tamaziɣt, tafransist, tafizikt, tunssna n ugama d teglizit. Tella-d teseqqamut n uktazal, i iɛemren 8 n yiselmaden ɣef lmendad n useɣti n tririyin-nsen d uwelleh-nsen.

Yebda wahil n uḥric-agi aneggaru n temsizzelt-agi, s leqdic adelsan, anida i fkan tagnit s teḍsa s temseḍsa i d-yeḥka unelmad Rabya, yeqqaren deg tesnawit n Lɛedlani. Yefka azal deg wayen i d-yules i umgarad yellan gar tmetti tazzayrit d tin n Fransa. Syin, tebda temsizelt s yisteqsiyen n umezruy akked wid n tusnakt. Mbeɛd tiririt n yinelmaden, tettunefk tegnit i ccna, ideg i d-ɣennan yinelmaden n tesnawit n Bujimaɛ snat n tezlatin s ṣṣut ḥlawen dayen kan. Tin ɣur-s, tella-d tuɣalin ɣer temsizzelt s yisteqsiyen n taɛrabt d wid n tfizikt. Deffir-s kan, tella-d tqaɛet n ccḍeḥ aqbayli, sɣur yinelmaden n uɣerbaz alemmas Mulud Ferɛun n Tizi Uzzu.

Tkemmel temsizzelt-agi, s yisteqsiyen n tutlayt tamaziɣt d wid n tussna tagamant, mbeɛd mi d-iban ugemmuḍ n yisteqsiyen-agi. D tarbaɛt n umezgun n tesnawit n Makuda, i d-yuraren tamezgunt meẓẓiyen, ideg i d-ugmen si tezlit-nni n “Ttar” n Matub Lwennas d wayen i d-sugnen nutni d adiwenni. Tessuli temsizzelt-agi s yisteqsiyen n tefransist d wid n teglizit, i iferqen gar yigemmaḍ n temsizzelt-a. Ayen icebḥen ahil n tesfugla-agi n taggara, d timenna n yisefra n ddeqs n yimedyazen imeqqranen n teqbaylit, s ṣṣut n umedyaz Ali Ḥmed Muḥmed.

Mbeɛd azal s 3 n tsaɛtin n temsizzelt d temɛessast akked umsizwer yeḥman gar yinelmaden n snat n tesnawiyin-agi, bannen-d yigemmaḍ n taggara. D tasnawit n umeɣras Slimani n Friḥa, i d-yufraren deg umḍiq amenzu, s 51,75 n tezmilin ɣef 80. Acu kan, ala azgen n tezmilt i tt-iferqen ɣef tesnawit n Faḍma n Summer n Tizi Uzzu, i d-yewwin amḍiq wis sin s 51,25 n tneqiḍin ɣef 80. Ɣer taggara, yella-d usebɣes n yinelmaden-agi s yigerdasen akked warrazen am wakken i ferqen ɣef tesnawiyin-agi sin warrazen imeqqran.

Syin akin, fkan yimsuddsen n leqdic-agi tagnit i unemhal n tenmehla n usegmi d usedwel n lwilaya n Tizi Uzzu, Mass Ḥmed Laɛlawi i d-yefkan taḥawact n yiwellihen i yinelmaden-agi yesɛeddayen akayad n BAC. D netta dɣa s timmad-is i yessulin tasfugla-agi n tagggara, ideg yerra tajmilt i wid yekkin deg usuddes n tezrigt-agi tis ṣat n temsizzelt-agi, yuɣal-d diɣ ɣef wazal-is d yibaɣuren-is. Ad d-nesmekti kan belli, timsizzelt-agi tebda ass n tmussni 16 yebrir 2019, s uttekki n 17 n tesnawiyin yettwaferqen ɣef 22 n dayrat n lwilaya n Tizi Uzzu.

Mbeɛd aṭas n yiḥricen, qqiment-d 4 n tesnawiyin i uḥric uqbel aneggaru, syin akin d tidak i d-yufraren deg uḥric-agi i yimḥezwaren deg uḥric n taggara.
Adaoun Abdelghani