Ḍḥan-d yisehwa n yiberdan, d tamentilt n tmettant tamezwarut di tmurt-a, imi simmal zerrin yiseggasen, simmal yettimɣuṛ umḍan n wid yettmettaten s yisehwa. Dɣa, deg yiḍ n 29/30 yebrir yezrin ɣef 03:53 n tnezzayt, iqeddacen n Uḥuddu aɣarim, seld asiwel n yiwen n umdan i asen-d-yessutren ad ruḥen s tazzla i tlemmast n temdint n Ticci, anda i yeḍṛa usegwu-a, uzzlen s uɣiwel ɣeṛ umḍiq-nni. Lameεna imi leḥqen, ufan amdan-nni yewweḍ leεfu n Rebbi, wagi d yiwen n yilemẓi i yesεan 31 n yiseggasen seg tdayṛa n Uweqqas, daymi i yettwawi srid ɣer sbiṭaṛ-nsen.
Seg tama tayeḍ, deg yiwen n wass, 30-04-2019 ɣef 17:42 n tmeddit, tettwaddhem yiwet n teqcict n tmeẓṛit, deg umḍiq iwumi qqaṛen Tizi n Lexmis, sɣur yiwet n tkeṛṛust. Taqcict-a, tesεa ala 4 n yiseggasen di leεmeṛ-is, dɣa temmut imir-n. Ma yella d win i igan taluft, yerwel srid. Tafekka n teqcict-a, tettwawi ɣer sbiṭaṛ n Sidi Ɛic, sɣur yiqeddacen n Uhuddu aɣarim. Am wakken i aɣ-d-leḥqen yisallen sɣur-sen, d akken gren-d iman-nsen ula ass n sed 01-05 iεeddan deg yilel n « AIGUADE » di Bgayet, imi wwḍen-asen-d yisallen belli yeɣreq yiwen n yilemẓi dinna. Imi leḥqen, iqeddacen-nsen sergen-t-id seg waman.
Dɣa, seld tasestant i xedmen, ufan-t d yiwen n usdawan seg Tɣerdayt i d-yusan akked d yemdukkal-is i wakken ad ḥewwsen. Wagi d Mass ( H.S ) i yesεan 21 n yiseggasen, i yettwawin i sbiṭaṛ n Bgayet. Ad d-nesmekti belli, amḍan n yisehwa n yiberdan deg wayyur n yebrir 2019, yewweḍ ar 123, deg-s mmuten 08 n yimdanen, jeṛḥen 167. Ma yella seg tazwara n 2019 ar ass-a, ḍṛan 526 n yisehwa, anda i mmuten 19 n yimdanen, u 616 nniḍen d imejṛaḥ.
K.K.