Ass n aram 2 deg yebrir 2019, tesruḥ teqbaylit yiwen n unaẓur-nniḍen, iruḥ-as i yidles wudem adelsan. D amedyaz Ahmed Lahlou i yewwḍen leɛfu n Rebbi ɣef leɛmer n 54 n yiseggasen deg sbiṭer n Frantz Fanon deg temdint n Bgayet, send mi yeqqim dinna ugar n 15 n wussan, mbeɛd aṭṭan iḍulen. Aṭas n yisefra i d-yeǧǧa Ḥmed Leḥlu i teqbaylit. Yessefra ɣef teqbaylit-is, yura yis-s, inuda fell-as, yessaweḍ ddeqs n yiznan i yimdanen yettnadin tafat deg yidles. Ur ntettu ara belli yella d aselmad deg uɣerbaz, yurar d asegbar deg tiliẓri tis rebɛa deg usaru n wudem mucaɛen n tmedyazt taqbaylit Si Muḥ Umḥend, anida Ḥmed Leḥlu, yurar-d udem n Si Muḥ Umḥend. Teḥzen teqbaylit, yettru yidles-is ɣef rrwaḥ-is. Yuklal tajmilt, imi urǧin inuda ɣef tedwilin deg tiliẓriyin neɣ anda-nniḍen akken ara yettwassen. Tamussni ɣur-s, d tamedyazt d yisefra i yessaweḍ i yimdanen. Ha-t-an dɣa yiwen gar yisefra-s
“D ayen i nwala
I aɣ-yeǧǧan d iderɣalen !
D ayen i nesla
I aɣ-yerran d iɛeẓẓugen !
D ayen i d-nenna
I aɣ-yessawḍen nessusem !
D wid akked nedda
I aɣ-yesbeɛden ɣef medden !
Tella-d temḍelt-is ass-nni n lexmis, 4 deg yebrir iɛeddan, deg taddart ideg ilul Taqerrabt, i d-yezgan deg temnaḍt n Yiɣil Ɛli, aẓi n At Ɛebbas, s uneḥḍur n waṭas n yimdanen i d-iwujhen akken ad ɛezzin tawacult-is, akken daɣen i llan waṭas n wudmawen n yidles (inaẓuren, imedyazen, imyura…). Yeǧǧa-d deffir-s sin n dderya. Ad yerḥem Rebbi amedyaz.
Kh. A.