Accueil Tamazight Mazal yettkemmil usunded di tesnawit

Taṣexṛiwt

Mazal yettkemmil usunded di tesnawit

57

Aɣbel n usunded i d-yellan di tsenawit n Maεuc Idris n Lberǧ n Mira, mazal-it ar ass-a yettkemmil. Deg lawan anda amur ameqqran n tesnawiyin n twilayt n Bgayet, qrib ad ssalin deg-sent yiselmaden ahil n tɣuṛi-nsen, tin n tɣiwant n Tṣexṛiwt, mazal-itt deg lqaε d ubellaε akken yeqqaṛ yinzi.

Seg tazwara n useggas 2019/2020, ur ufin yinelmaden n tsenawit-a iman-nsen. Ladɣa wid n uswir aneggaru (BAC), imi yettεassa-ten-id usεeddi n ukayad s wazal-is. Rnu i waya, ula d igemmaḍ-nsen n ukṛaḍyur amezwaru, ur ṣṣefṛaḥen ara. Ad d-nesmekti d akken, ula d igemmaḍ-a, ur ten-ṭṭfen ara yinelmaden deg lawan-nsen. S unamek-nniḍen, fkan afus akken ma llan, ama d imasayen n tsenawit-a, ama d ibabaten n warrac. Dɣa d ayen i yessewhamen ugar, amek armi bran yibabaten n warrac i yifassen-nsen ur xdimen tiqqit.

Ɣas ma yella d imal n warraw-nsen i teɛna temsalt? Γef tmentilin n usunded-a, ṭṭuqtent ɣef leḥsab n teɣbalut-nneɣ. Ama seg tama n yinelmaden, neɣ seg tin n yiselmaden. Meḥsub d yiwen n uɣbel i ten-icerken. Seg lexṣaṣ n ttawilat, lḥif d lmeḥna i ttidiren yal ass, armi d yir tuddsa deg tesnawit-a.

Aṛiḍa, mazal ur tefri deg-s. Aredmani, ulac win yenḍeṛṛen ugar, am yinelmaden. Γef usentel-a tenna-aɣ-d yiwet n tnelmadt: «tasnawit-nneɣ i yellan gar tmezwura di twilayt n Bgayet, ass-a tuɣal d annar n usunded. Ugin yinelmaden ad gzun belli d nutni i d-iseflan n waya. Am yal tikkelt, ad aɣ-d-ḍeggṛen timsirin di tewriqin, imir-n ḍebber i uqerru-k. Yerna llan wid yesteqsayen ɣef tmentilt n yir igemmaḍ». Tkemmel deg wawal-is : «ilaq imawlan-nneɣ, ad nnejmaεen s uɣiwel, ad d-afen tifrat i uɣbel-a, uqbel ad ifat lawan».
K. K.