Aṭas n yiɣerman deg twilayt n Wehran i yettcetkin seg yir addad-nsen amatu i d-gran. Ayen i yessewhamen, d akken iɣerman-a d wid ur nebɛid ara ɣef tlemmast n temdint. Ma nebder-d gar-asen iɣrem Sidi Lhewwari d uzniq Philipe i hujren wazal n 80% n yimezdaɣ-nsen. Maca iɣrem n Dderb i yellan ula d netta deg tlemmast n temdint (100 n lmitrat kan ɣef umraḥ n yimrigen), yezga yedder deg yir liḥala. Ma nmuqel iɣraben d yibalkuten n yixxamen-is, ad ten-naf hrurin merra, ulac acu i d-yeqqimen deg-sen.
Ma nwala ɣer lqaɛa d yiberdan-is iḍeyqen daɣen kif kif, ur sliḥen ara ula i tikli ɣef uḍar, ula d ṭṭubat (iɣerdayen imeqqranen), zgan tteffɣen keccmen seg uxxam ɣer wayeḍ. Ma nuɣal ɣer tallit ideg tella Fransa tamhersant deg tmurt n Lezzayer, ad naf amḍiq n Dderb gar yimeḍqan ifazen ifeǧǧen deg temdint n Wehran, maca imir-a yuɣal seg yineggura. Tura, imezdaɣ i d-yeqqimen, zedɣen din ur ttawḍen ara 50%, wigi d wid ur nezmir ara ad aɣen ixxamen anda-nniḍen. Gar-asen, llan wid ur nettqaḍaɛ ara tacehrit-nsen, llan wid ur nxeddem ara maḍi. Ma d 50% i yessawḍen ruḥen seg Dderb, d wid yeṭṭfen ixeddim yelhan, d wid yeṭṭfen tinezduɣin-nsen baṭel deg yiɣrem-a asmi teffeɣ tmurt n Fransa seg Lezzayer. Imezdaɣ i d-yeqqimen din, ttemɛebbaren d wussan d yiɣeblan, zgan d acetki.
Uznen ṣṣut-nsen srid ɣer lwali n twilayt n Wehran, i waken, ya ad asen-ibeddel tinezduɣin ɣer wanda iwulem, ya ad d-yili uɛiwed d ureqqeɛ n yixxamen-nsen sɣur taɣiwant n Wehran, d ssrabes yestkelfen s uɛiwed n yiɣerman iqburen i qrib ad ɣlin. Gan agraw s yisem n yiɣrem-nsen deg uẓeṭṭa inmetti, deg-s suzren-d icetkiyen-nsen d tugniwin n yixxamen-nsen iqburen. Ɛlaḥsab n yimezdaɣ-agi, nutni ur zmiren ara, acku ula d azref n yixeddim ur ten-id-iṣaḥ ara. D asmekti kan ɣer taggara, belli tuget n yimezdaɣ n Dderb, ruḥen ɣer temdint n Wehran seg temnaḍt n Leqbayel, armi d iseggasen-a ineggura i bdan keccmen-t kra n yimezdaɣ-nniḍen.
Yella-d wurar deg 720 n tnezduɣin
Seg tama-nniḍen, ma nemmeslay-d ɣef tnezduɣin s talɣa tinmettit deg twilayt-a n Wehran, ad naf nnefṣ deg-sent deg uḥric aneggaru i d-yeffɣen, ṣaḥent-d kra n yiɣriben, ad tent-rnun d tinezduɣin n zzyada, d twaculin yeḥwaǧen anda ara zedɣent, seg wid ixeddmen deg Wehran. Maca tiwilayin-nsen tinaṣliyin d tid i d-iqerben ɣer temnaḍt-a, am Mustɣanem, Ɣilizan, Mɛesker neɣ ula seg tmanaɣt, uɣen tinezduɣin-a s ssuma gar 50 d 200 n yimelyan i F3.
Tinezduɣin-a, niqal ttwabnant akken ad ttwaferqent i twaculin ur nesɛi ara anda ara zedɣent (SDF), neɣ i twaculin yeddurin deg yibaṭimuten yehrurin seg wid i d-teǧǧa Fransa. Maca wid yeṭṭfen lamer n tnezduɣin-a, xedmen ayen yeffɣen fell-asen. Ffɣent-d s lekmal 720 n tnezduɣin, 112 deg yiɣrem El Ḥemri, 100 deg Sidi Lhewwari, 50 deg St Pierre … Wigi yellan deg wumuɣ n tidet n ufraq-nsent, seg tazwara steqsayen ɣer ssrabes n tɣiwanin akken ad ẓren ma ad d-sfaydin, maca ssrabes-a, ssemrasen tutlayt n wudmawen, tefreq-itent i wid tebɣa. Iḥun Rebbi, tikkelt-a d lwali n Wehran Mass Mulud Crifi i d-ifaqen s twaɣit-agi seld inejmuɛen akked yiselwayen d yimasayen n tɣiwanin n Wehran, skeflent-d temliliyin-a tikerkas i yettwasxedmen deg ufraq n tnezduɣin, d ayen i t-yeǧǧan ad d-yini i tɣamsa send iḍelli “Wid i d-yesfaydin seg tnezduɣin timezdayin, aḥric aneggaru n 720 n tnezduɣin, azgen deg-sen ur tent-uklalen ara”.
Dɣa yumer ad d-tili tsastant mgal lemyur yettwaḍelmen. Aqerruy amenzu n twilayt n Wehran, yessuter ula ad d-ilint tsastanin-nniḍen ɣef tukerḍa d lefsad i d-yettilin, i d-yellan yakan zik deg wakal n twilayt-a. Tawaɣit, d akken wid yuraren s uneqqis n tikkelt-a, aqerru-nsen d lwali aqdim n Wehran yuɣalen syin akkin d aneɣlaf n lecɣal n uzayez, Abdelɣani Zeɛlan yellan tura deg lḥebs n Lḥerrac, netta akked sin seg tarwa n ujiniral Hamel d kraḍ n yimɛellmen meqqren n tnezduɣin. Kksen azref n twaculin yettraǧun 30 n yiseggasen-aya. Sdat n twaɣiyin am ti sɣur yimasayen iqdimen, yumer Mass Crifi s lɛejlan akken ad d-tili tsastant mgal-nsen imi rran tawilayt-a d ssuq sdat n wallen n yimdanen.
Kh. A.